Aqsu wilayiti boyiche 49 mingdin artuq a'ilining qoru-jayliri chéqilip özgertilgen

Uyghur élining herqaysi jaylirida Uyghurlar topliship olturaqlashqan mehelle-koylarni chéqip, yerlik ahalilerni tarqaqlashturush, ularning en'eniwiy turmush usulini özgertiwétish pilanining jiddiy ijra qiliniwatqanliqi melum.

“Aqsu axbarat tori” élan qilghan xewerge qarighanda, aqsu wilayiti 2000-yilining axiridin burun sélin'ghan sheher-bazarlardiki kona olturaq mehellilerni nuqtiliq özgertip, hazirghiche 395 kona kona mehelle rayonni chéqip özgertishni yolgha qoyghan. Xewerde déyilishiche, bu qurulush jem'iy 49 ming 777 a'ilige chétilidiken.

Xitay da'iriliri kona olturaq rayonlarni chéqish-tüzlesh qurulushini izchil halda “Xelqning turmush shara'itini yaxshilash” dep perdazlap kelmekte. Biraq chet ellerdiki Uyghur pa'aliyetchiliri we mutexessiliri Uyghur éli miqyasi boyiche “Kona öylerni yéngilash” namida Uyghurlar topliship olturaqlashqan mehellilerni chéqish heriketlirini “Zémin bilen kimlik arisidiki munasiwetni üzüshni we mutleq kontrolluqni ishqa ashurushni meqset qilghan,” dep qarimaqta.

Xitay hökümiti 2017-yildin buyan milyonlighan Uyghurni lagérlargha qamash, yashlarni türküm-türkümlep xitay ölkilirige yötkesh bilen bir waqitta yene Uyghurlarning olturaq rayonlirini buzup-chéqip, ularning yashash usuli we en'enisini özgertiwétishke urunup kelmekte.