Уйғур дияридики ислам дини рәһбәрлик коллектипиниң сиясий вәзиписи диққәт қозғимақта

Хитай һөкүмити башқурушидики “тәңритағ” ториниң 13-апрелдики хәвиридә ейтилишичә, уйғур аптоном районлуқ ислам дини җәмийитиниң йеңи бир нөвәтлик рәһбәрлик гурупписи “сайлам” арқилиқ барлиққа кәлгән. Шуниңдәк уларниң йеңи хизмәт низамнамисиму мақулланған. Бу мунасивәт билән уйғур аптоном районлуқ парткомниң баш секретари чен чүәнго вә ‍уйғур аптоном районлуқ һөкүмәтниң рәиси шөһрәт закир қатарлиқ әмәлдарлар йеңидин шәкилләнгән бу диний рәһбәрлик коллектипини қобул қилған.

Хәвәрдә ейтилишичә, қобул қилиш мурасимида хитай һөкүмитиниң әмәлдарлири бу диний затлардин “вәтәнпәрвәрлик байриқини егиз көтүрүп, ислам динини иттипақлиқ вә инақлиқ үчүн хизмәт қилдуруш” ни тәләп қилған. Шундақла сиясий җәһәттә ишәнчлик болуш, һалқилиқ пәйттә ‍өз ролини җари қилдуруш, партийә вә һөкүмәт билән яхши иттипақлиқ орнитишни алаһидә тәкитлигән. Бу уйғур аптоном районлуқ ислам дини җәмийитиниң хизмәт низамнамисидики “ислам динини хитайчилаштуруш, компартийәниң рәһбәрликини вә һөкүмәтниң шинҗаңни башқуруш истратегийәсини иҗра қилиш, иҗтимаий муқимлиқ вә әминлик үчүн хизмәт қилиш, әсәбийликни түгитишкә һәссә қошуш, хитай кимлики қаришини мустәһкәмләш” дегәнләр билән охшаш мәзмунда икән.

Бу йиллиқ рамзан ейи башлиниши билән оттуриға чиққан бу “сайлам” вә хитай әмәлдарлириниң қобул қилиши һәққидә сөз қилған анализчилар буниң хитай һөкүмитиниң йәнә бир қетим дуняни алдаш һелиси икәнликини тәкитлиди. Улар “уйғур диярида һазир ислам диниға даир һечнәрсә қалмиған, уйғурлар рамзанда чошқа йейишкә мәҗбурлиниватқанда хитай һөкүмитиниң мушу сахта сайламдин барлиққа кәлгән азғинә диний затларниму өзлириниң сиясий ғәрәзлиригә қорал қилмақчи болуши бу һакимийәтниң нәқәдәр рәзил икәнликиниң йәнә бир испати” деди.