Uyghur diyaridiki islam dini rehberlik kolléktipining siyasiy wezipisi diqqet qozghimaqta

Xitay hökümiti bashqurushidiki “Tengritagh” torining 13-apréldiki xewiride éytilishiche, Uyghur aptonom rayonluq islam dini jem'iyitining yéngi bir nöwetlik rehberlik guruppisi “Saylam” arqiliq barliqqa kelgen. Shuningdek ularning yéngi xizmet nizamnamisimu maqullan'ghan. Bu munasiwet bilen Uyghur aptonom rayonluq partkomning bash sékrétari chén chüen'go we ‍Uyghur aptonom rayonluq hökümetning re'isi shöhret zakir qatarliq emeldarlar yéngidin shekillen'gen bu diniy rehberlik kolléktipini qobul qilghan.

Xewerde éytilishiche, qobul qilish murasimida xitay hökümitining emeldarliri bu diniy zatlardin “Wetenperwerlik bayriqini égiz kötürüp, islam dinini ittipaqliq we inaqliq üchün xizmet qildurush” ni telep qilghan. Shundaqla siyasiy jehette ishenchlik bolush, halqiliq peytte ‍öz rolini jari qildurush, partiye we hökümet bilen yaxshi ittipaqliq ornitishni alahide tekitligen. Bu Uyghur aptonom rayonluq islam dini jem'iyitining xizmet nizamnamisidiki “Islam dinini xitaychilashturush, kompartiyening rehberlikini we hökümetning shinjangni bashqurush istratégiyesini ijra qilish, ijtima'iy muqimliq we eminlik üchün xizmet qilish, esebiylikni tügitishke hesse qoshush, xitay kimliki qarishini mustehkemlesh” dégenler bilen oxshash mezmunda iken.

Bu yilliq ramzan éyi bashlinishi bilen otturigha chiqqan bu “Saylam” we xitay emeldarlirining qobul qilishi heqqide söz qilghan analizchilar buning xitay hökümitining yene bir qétim dunyani aldash hélisi ikenlikini tekitlidi. Ular “Uyghur diyarida hazir islam dinigha da'ir héchnerse qalmighan, Uyghurlar ramzanda choshqa yéyishke mejburliniwatqanda xitay hökümitining mushu saxta saylamdin barliqqa kelgen azghine diniy zatlarnimu özlirining siyasiy gherezlirige qoral qilmaqchi bolushi bu hakimiyetning neqeder rezil ikenlikining yene bir ispati” dédi.