Xitay hökümiti Uyghur diyaridiki diniy étiqad erkinliki heqqide doklat élan qildi

Xitay hökümiti 3-öktebir küni “Shinjang islam jem'iyiti” namidin Uyghur diyaridiki diniy étiqad erkinlikining hazirqi omumiy ehwali heqqide eng yéngi doklat élan qilip, özlirining Uyghur we bashqa musulmanlarning diniy heqlirini hémaye qiliwatqanliqini tekitligen.

Bu qétimqi doklatta xitay hökümiti Uyghur diyarida diniy étiqad heqlirining toluq kapaletke ige ikenlikini, normal diniy étiqad erkinlikining héchqandaq cheklimige uchrimaydighanliqini, shuningdek xitay hökümitining peqet “Diniy esebiy unsurlar” ghila zerbe bériwatqanliqini alahide tekitligen. Shuning bilen birge, amérika we yawropada musulmanlarning qandaq kemsitish we cheklimilerge uchrawatqanliqini bayan qilish arqiliq özlirining bu jehette qandaq “Keng qorsaq” ikenlikini eskertken.

Halbuki, shahidlar we xitay hökümitining resmiy höjjetliri Uyghurlardiki islam dini bilen baghlinishliq herqandaq pa'aliyetning kishilerni lagérgha qamashtiki muhim seweb boluwatqanliqini, Uyghurlarning hazir diniy étiqad erkinliki heqqide söz échishning qilchilikmu imkaniy qalmighanliqini, eng eqellisi yéngi tughulghan bowaqlargha “Muhemmed” dep isim qoyushqimu bolmaydighanliqini namayen qilmaqta. Analizchilar mushu xil ré'alliqni tilgha alghan halda xitay hökümitining bu yéngi doklatini “Héchkimni ishendürelmeydighan, yene kélip tola dewérip bekla konirap ketken yalghan sözler. Ramizan mezgilide musulmanlarni choshqa göshi yéyishke mejburlighan bir hakimiyetning diniy étiqad erkinliki heqqide söz qilishi uchigha chiqqan nomussizliq,” dep körsetti.