Amérikaning xelq'ara diniy ishlar bash elchisi: “Uyghur balilirigha néme üchün muhemmet, dep isim qoyushqa bolmaydu”

Amérika tashqi ishlar ministirliqining xelq'ara diniy ishlar bash elchisi sam browénbek xongkongda nutuq sözlep, xitayning Uyghurlarni basturuwatqanliqini tenqidligen. Uning ilgiri sürüshiche, nöwette xitay kompartiyisi diniy étiqadqa qarshi urush qiliwatqan bolup, uning siyasiti ashqunluq kücheytishi mumkin iken. U bu sözlerni 8‏-mart küni xongkong chet'ellik muxbirlar kulubida nutuq sözligende qilghan.

Amérika simliq xewerler tori s n n ning xewer qilishiche, u xitayda katoliklar, musulmanlar, tibetlik buddistlargha qarita kemsitishning kücheygenlikini eskertip, “Xitay kompartiyisi dindar kishilerdin qorqamdu? u néme üchün injilgha bash qoyghan xelqige ishenmeydu? Uyghur balilirigha néme üchün muhemmet, dep isim qoyushqa bolmaydu? néme üchün tibetlerning ming yildin béri dawamlashturup kelgen özining diniy rehberlirini özi saylishigha hörmet qilmaydu?” dep so'al qoyghan. S n n téléwiziyesining tekitlishiche, sam browénbekning sözi béyjingning bir milyondin artuq musulman Uyghurni yighiwélish lagérlirigha qamishi keltürüp chiqarghan xelq'ara naraziliqni ipadiligen.

Browénbek sözide yene Uyghurlarning diniy étiqadi seweblik xalighanche tutqun qilin'ghanliqini eskertip, “Biz bu lagérlar qandaq bolsa shundaq atishimiz kérek. Bu orunlar az sanliq milletlerning medeniyet we diniy kimlikini yoqitish meqsitide qurulghan yighiwélish lagérliridur” dégen. Uning ilgiri sürüshiche, bu lagérlarda “Tutqunlar jismaniy we rohiy ten jazasigha, siyasiy özgertishke, mejburi emgekke sélinmaqta” iken. U, bu orunlarning xitay éytqandek ashqunluqni tügetmeydighanliqi, belki uning ashqunluqni “Peyda qiliwatqanliqi” ni tekitligen. Amérika hökümitining ilgiri sürüshiche, nöwette bu lagérlarda 800 mingdin 2 milyon'ghiche Uyghur, qazaq we bashqa musulman az sanliq milletler tutup turulmaqta iken.