Уйғур елида җ х назаритиниң йәнә бир әмәлдари хизмитидин қалдурулди

Дүшәнбә күни хитай даирилири уйғур аптоном районлуқ җ х назаритиниң муавин назириниң интизамни бузғини үчүн җазаланғанлиқини елан қилди.

Хитай интизам тәкшүрүш комитети ториниң 28-февралдики уқтурушида, җ х назаритиниң муавин назири ше хуй “интизамға еғир дәриҗидә хилаплиқ қилғанлиқи үчүн, хизмитидин қалдурулуп, компартийә әзалиқидин елип ташлинип, қанун орунлириға тапшурулғанлиқи” елан қилинди.

Хитайниң шинҗаң хәвәрләр ториниң 29-феврал дүшәнбә күнидики хәвиридиму уйғур аптоном районлуқ җ х назаритиниң муавин назири ше хуйниң сиясий интизам вә сиясий қаидә түзүмләрни еғир дәриҗидә бузғанлиқи, тәшкилниң тәкшүрүшигә қаршилиқ қилғанлиқи, кадирларни өстүрүш қатарлиқларда һоқуқидин пайдилинип мәнпәәткә еришиш, өзигә алақидар мәсилиләрни йошуруш, ялған мәлумат йоллаш қатарлиқ қилмишлири сәвәблик, җ х назаритидики барлиқ хизмәтлиридин елип ташлинип, әдлийә орунлириниң бир тәрәп қилишиға йолланғанлиқи тилға елинди.

Мәлум болушичә ше хуй уйғур аптоном райони тәвәликидә икки күн ичидә җазаланғанлиқи елан қилинған йәнә бир назир дәриҗилик әмәлдар болуп, даириләр 28-феврал йәкшәнбә күни уйғур аптоном районлуқ һөкүмәтниң сабиқ баш катипи алимҗан мәмтиминниң партийәдин чиқирилип, хизмитидин қалдурулуп, әдлийә органлириниң қанун бойичә бир тәрәп қилишиға тапшуруп берилгәнликини елан қилған иди.