Uyghur élida j x nazaritining yene bir emeldari xizmitidin qalduruldi

Düshenbe küni xitay da'iriliri Uyghur aptonom rayonluq j x nazaritining mu'awin nazirining intizamni buzghini üchün jazalan'ghanliqini élan qildi.

Xitay intizam tekshürüsh komitéti torining 28-féwraldiki uqturushida, j x nazaritining mu'awin naziri shé xuy “Intizamgha éghir derijide xilapliq qilghanliqi üchün, xizmitidin qaldurulup, kompartiye ezaliqidin élip tashlinip, qanun orunlirigha tapshurulghanliqi” élan qilindi.

Xitayning shinjang xewerler torining 29-féwral düshenbe künidiki xewiridimu Uyghur aptonom rayonluq j x nazaritining mu'awin naziri shé xuyning siyasiy intizam we siyasiy qa'ide tüzümlerni éghir derijide buzghanliqi, teshkilning tekshürüshige qarshiliq qilghanliqi, kadirlarni östürüsh qatarliqlarda hoquqidin paydilinip menpe'etke érishish, özige alaqidar mesililerni yoshurush, yalghan melumat yollash qatarliq qilmishliri seweblik, j x nazaritidiki barliq xizmetliridin élip tashlinip, edliye orunlirining bir terep qilishigha yollan'ghanliqi tilgha élindi.

Melum bolushiche shé xuy Uyghur aptonom rayoni tewelikide ikki kün ichide jazalan'ghanliqi élan qilin'ghan yene bir nazir derijilik emeldar bolup, da'iriler 28-féwral yekshenbe küni Uyghur aptonom rayonluq hökümetning sabiq bash katipi alimjan memtiminning partiyedin chiqirilip, xizmitidin qaldurulup, edliye organlirining qanun boyiche bir terep qilishigha tapshurup bérilgenlikini élan qilghan idi.