Xelq'arada xitayning Uyghurlar üstidin élip barghan gén tetqiqatigha bolghan naraziliq kücheytmekte

Muxbirimiz erkin
2019-12-06
Élxet
Pikir
Share
Print

Xelq'ara ilim saheside xitayning Uyghurlar üstidin élip barghan gén tetqiqatigha bolghan naraziliq kücheytmekte. "Nyu-york waqti" gézitining ashkarilishiche, dunyadiki nopuzluq ilmiy zhornallardin bolghan "Spirin'gér tebi'et" zhurnili bilen "Wayléy" zhurnili bu hepte xitay tetqiqatchilirining mezkur zhurnallarda élan qilin'ghan Uyghur we tibet we bashqa az sanliq milletlerning gén tetqiqatigha alaqidar ilmiy maqalilirini qayta közdin kechüridighanliqini bildürgen.

Yéqinda‏ "Nyu-york waqti" géziti, xitay tetqiqatchilirining Uyghur élidiki tumshuq shehiride Uyghurlarning DNA si arqiliq ularning chirayini tonush tetqiqati élip bériwatqanliqi, mezkur programmining xitay amanliq organlirining hemkarliqida élip bériliwatqiliqini xewer qilip, uninggha qatnishiwatqan ikki xitay tetqiqatchisining kimliki we bu tetqiqatchilarning bezilirini gérmaniyediki bir ilmiy jem'iyetning yardem puli bilen teminligenlikini ashkarilighan. Lékin, gérmaniyediki mezkur ilmiy jem'iyet radiyomizgha özlirining bu ishta jawabkarliqi barliqini ret qilghanidi. "Nyu-york waqti" gézitining xewiride ashkarilinishiche, yuqiriqi ikki ilmiy zhornal özliride élan qilin'ghan Uyghurlarning gén tetqiqatigha da'ir ilmiy maqalining aptorliridin DNA ewrishkilirini tetqiqatta ishlitishte kishilerning raziliqini alghan-almighanliqini éniqlaydighanliqini bildürgen. "Nyu-york waqti" gézitining tumshuq shehiridiki DNA tetqiqatigha da'ir xewiri xelq'ara ilim saheside xitayning "Ilmiy exlaq" ölchimige so'al peyda qilghanidi. Uyghur kishilik hoquq teshkilatlirining ilgiri sürüshiche, nöwette 3 milyondek adem lagérlargha qamalghan Uyghur rayonida Uyghurlarning raziliq élish-almasliq mesiliside héchqandaq tallash erkinliki yoq iken.

Pikirler (0)
Share
Toluq bet