Uyghurlar diyaridiki intérnétqa da'ir yéngi jinayet tebiri xelq'ara metbu'atlarning qiziq nuqtisi bolup qaldi

Ötken hepte Uyghurlar diyaridiki bir yashni xitay bixeterlik saqchilirining “Tor tosuqliridin atlash eplirini chüshürüp, 2-derijilik térrorluq jinayiti sadir qilghan” dep eyibligenliki heqqidiki xewer ashkarilan'ghandin kéyin, bu hadise chet'el metbu'atlirining muhakime qilidighan qiziq nuqtiliridin bolup qalghanliqi melum.

“Yer shari sadasi” tor gézitining 31-öktebirdiki maqaliside éytilishiche, kimning némini chüshürüshi intérnét dunyasida unchiwala chong ghulghula qilghudek weqe hésablanmisimu, “Tosuq atlash eplirini chüshürüsh” ning 2-derijilik térrorluq qilmishi hésablinishi bekmu ejeblinerlik hadise iken.

Bu heqte pikir qilghan bireylen “Bilishimche, bu xil bir yaqliq qilish pütkül xitaygha ortaq emes. Shundaq bolsimu xitaygha sayahetke barghinimda kompyutérimgha ornitip qoyghan shu xildiki epler sewebidin qolgha élinishimning éhtimalliqi qanchilik?” dégen.

Melum bolushiche, xitaydiki intérnét ishletküchilerdin 1% tin 3% kiche bolghan kishi chet'el tor béketlirini ziyaret qilish üchün mexpiy halda tor tosuqliridin bösüp ötüsh eplirining yardimige tayinidiken. Shuning bilen bir waqitta, Uyghurlar diyaridiki intérnét bixeterliki we tor süzgüchi jehettiki qattiq bashqurush tedbirliri izchil halda kishilerning da'imliq söhbet témiliridin bolup kelmekte.