Xitay hökümiti: “Aliy mektep püttürgenlerning köpinchisi ishqa orunlashti!”

Xitay hökümiti bashqurushidiki shinxu'a agéntliqining 26-dékabirdiki xewiride 2020-yili Uyghur diyaridiki herqaysi aliy mekteplerdin oqush püttürgen oqughuchilarning 89 pirsentining ishqa orunlashqanliqi alahide yer aldi.

Xewerde éytilishiche, Uyghur diyaridiki herqaysi idare-organlar we karxanilar xizmet ornining muqim bolushini ishqa ashurush üchün türlük qiyinchiliqlargha qarimay aldi bilen oqush püttürgen oqughuchilarni xizmetke alghan. Buningda oxshimighan “Étibar” we “Righbetlendürüsh” wastiliri arqiliq oqush püttürgen oqughuchilarni bu orunlargha “Jelp” qilghan.

Xewerde bu oqughuchilarning ‍uyghur yaki xitay ikenliki éytilmighan. Emma analizchilar xitay hökümitining ‍uyghur diyaridiki chékidin ashqan idare qilish tedbirlirining Uyghurlarni xanu-weyran qilipla qalmastin eksiche bu jaylargha kélip ishlewatqan xitay kadirlarningmu bir ilaj qilip ichkirige qéchip kétishige seweb boluwatqanliqini alahide tekitleydu. Ular shu asasta “Bu qétim ishqa orunlashqan aliy mektep oqughuchiliri belkim ashu xil ‛qachqun‚ kadirlar peyda qilghan bosh orunlarni toldurghan bolushi mumkin,” déyishti.