Qul emgiki éghir bolghan Uyghur élide ishqa orunlashquchilarning muqim éshiwatqanliqi teshwiq qilin'ghan

Uyghur élide mejburiy emgekning éghirliqi pütün dunyaning diqqitige aylan'ghan bir mezgilde, xitay metbu'atliri Uyghur élide yéngidin köpiyiwatqan ish pursetliri we ishqa orunlashquchilarning muqim éshiwatqanliqini qerellik halda teshwiq qilip kelmekte.

Xitayning “Shinjang géziti” 6-awghust bergen xewerge qarighanda, bu yilning aldinqi yérimda Uyghur élidiki sheher bazarlarda yéngidin ishqa orunlashquchilar 310 mingdin ashqan bolup, yilda 460 ming ademni ishqa orunlashturush pilanining köp qismi orunlinip bolghan.

Xewerde déyilishiche, aldinqi yérim yilda Uyghur élidiki yilliq ishlepchiqirish qimmiti 5. 4 Pirsent ashqan, buninggha egiship her qaysi kesipler we mal teminlesh zenjiridiki ish pursiti we ish telep qilghuchilar téximu köpeygen. Bularning ichide “Aliy mektepni püttürgenler, yéza emgek küchliri we ish tépishi qiyin bolghanlarni ishqa orunlashturush hökümet tarmaqlirining asasliq wezipisi boldi” déyilgen bolsimu, xewerdiki sanliq melumattin ularning ishqa orunlishish nisbitining töwen ikenliki körülmekte. Xewerde körsitilishiche, aldinqi yérim yilda Uyghur élidiki kespiy terbiyelesh merkezliri 840 ming qétimdin artuq adem terbiyeligen bolup, ularni qeyerge éhtiyajliq bolsa shu yerge ewetken, yeni ularni qaratmiliq halda “Ishqa orunlashturghan”.

Bu xewerde éytilghan “Kespiy terbiyeleshni küchep tereqqiy qildurush” sho'ari, tetqiqatchi adriyan zénz éytqan “Yighiwélish lagérlirining shekli özgergen emgek lagérlirigha” aylan'ghanliqini, Uyghur élide mejburiy emgekning uzun mezgil dawam qilidighanliqini körsetmekte.