Рошән аббас ханим: "байдин һөкүмити мениң һәдәм вә башқа барлиқ уйғурларни түрмә-лагердин қутулдуруш үчүн күрәш қилиши лазим"

Мухбиримиз җәвлан
2021-01-26
Share

Уйғур һәрикити тәшкилатиниң башлиқи рошән аббас ханим 25-январ "вашингтон почтиси" гезитидә мақалә елан қилип, җов байдин һөкүмитидин доктор гүлшән аббас вә башқа барлиқ уйғурларни түрмә-лагерлардин қутулдуруш үчүн күрәш қилишқа чақириқ қилған.

Рошән аббас ханим бу мақалисидә хитай һөкүмитиниң өч елиш характерлик тутқун қилип, 20 йил кесивәткән һәдиси гүлшән аббас вә униң аилисидикиләр дуч кәлгән паҗиәни тилған елип, мушу типик вәқәдин хитай һөкүмитиниң нәқәдәр рәзил, қәбиһ вә зораван һакимийәт икәнликини, йиллардин бери пүтүн уйғурға төһмәт чаплап, уларға хилму хил пәскәш нәйрәңләр, қорқунчлуқ васитиләр билән зиянкәшлик қилип кәлгәнликини баян қилған.

Рошән аббас ханимниң билдүрүшичә, хитайниң бу җинайитини тохтитиш үчүн униң қорқунчлуқ пиланини көрүп йетиш керәк. Хитайниң мәқсити иқтисадий җәһәттин күчлиниш, сиясий җәһәттин йетәкчи орунға өтүш вә дуняға кеңәймчилик қилиш. Трамп һөкүмити хитайниң зулумини "ирқий қирғинчилиқ" дәп атиған, җов байдин һөкүмитиму буни муәййәнләштүргән болсиму, буниңлиқ билән хитайниң давамлиқ йүргүзүп келиватқан бу җинайитини тохтитип қалғили болмайду. Алди билән хитайниң "заманиви қуллуқни нормаллаштуруш, дуняни мәнпәәт вә күч талишиш сәһнисигә айландуруш" тактикисиға зәрбә бериш лазим. Уйғурларни қул қиливатқан хитай завутлири билән содилишип, ирқий қирғинчилиққа шерик болуватқан америка вә явропа ширкәтлирини бу қилмиштин тохтитиш керәк. Буниң үчүн җов байдин һөкүмити хитай билән болидиған дипломатийә вә сода алақилиридә заманиви қуллуққа хатимә бериш ишини муһим күнтәртипкә қоюши керәк. Хитайға иқтисад җәһәттин зәрбә бәрмигүчә сиясий җәһәттин бесим қилғили болмайду. Мәҗбурий әмгәкни аяғлаштурмиғичә лагерлар мәсилисини һәл қилғили болмайду. Буниң үчүн җов байдин һөкүмити зор тиришчанлиқ көрситиш лазим.

Рошән аббас ханим җов байдин һөкүмитиниң "уйғур кишилик һоқуқ қанун лайиһәси" гә бинаән уйғурларниң һоқуқ-мәнпәәтини қоғдашқа, "таможна беҗи қанун лайиһәси" ниң 307-маддисиға асасән, мәҗбурий әмгәккә мунасивәтлик малларни импорт қилмаслиққа вә америка ширкәтлирини хитайниң ирқий қирғинчилиқ җинайитигә шерик болуштин тосушқа чақириқ қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт