Xitay hökümiti lagérlarni taqashning waqti heqqide söz qildi

Uyghur diyaridiki lagérlar mesilisi xelq'araning küchlük diqqitini qozghawatqanda béyjingdiki xelq qurultiyining yighinigha qatnishiwatqan Uyghur aptonom rayonluq hökümet xadimliri “Kespiy terbiyelesh merkizi” dep atiliwatqan lagérlarni taqashning waqti heqqide muxbirlarning so'allirigha jawab berdi.

Birleshme agéntliqning 12-marttiki xewirige qarighanda Uyghur aptonom rayonluq hökümettin qurultaygha ewetilgen wekiller ömikining ezasi, Uyghur aptonom rayonluq hökümetning re'isi shöhret zakir béyjingdiki muxbirlarni kütüwélish yighinida “Terbiyelesh merkezliri” diki kursantlarning sani heqqide soralghan so'allargha jawab bérishni ret qilghan hemde “Terbiyeliniwatqan kishilerning heqiqiy sani chet'eldiki yaman gherezlik kishiler dewatqandek ‛bir milyon kishi‚ dégendin zor derijide az” dégen.

Shöhret zakir lagérlardiki kishilerning qamilish sewebi heqqidiki so'allargha jawab bérip: “Biz héchqandaq diniy étiqadni nishan qiliwatqinimiz yoq.

Kursantlar xuddi yataqliq mektepte yétip oqughandek oqup, adette hepte axirliri öylirige qaytip kétidu” dégen. Muxbirlar bu xil “Terbiyelesh” ning qachan axirlishidighanliqi heqqide sorighanda shöhret zakir “Qachanki shinjangda bu xil terbiyeleshke éhtiyaj qalmighanda biz bu terbiyelesh merkezlirini tedrijiy emeldin qaldurimiz” dégen.

Shuningdek bu xil “Terbiyelesh” ijra bolghan ikki yil ichide héchqandaq zorawanliq we térrorluq weqesining yüz bermigenlikini buninggha misal qilip körsetken. Axirida “Emma buningliq bilen biz bir deqiqimu boshap qalmasliqimiz lazim” dégen.

D u q ning bayanatchisi dilshat réshit bu heqte pikir bayan qilip: “Uyghurlar mewjutla bolidiken, xitay hökümitining bu xil terbiyeleshke bolghan éhtiyaji menggü tügimeydu. Démek, bu xitay hökümitining lagérlarni taqash niyitining yoqluqining ipadisi” dédi.