“хитайниң тутуп туруш лагерлиридики чирайлар” мавзулуқ программа мукапатқа еришкән

Әнгилийә BBC радийо-телевизийәсиниң хәлқарада “шинҗаң сақчи һөҗҗәтлири” дәп елан қилинған зор һәҗимлик тәкшүрүш доклати һәққидә ишлигән мәхсус хәвири, хәлқара кәчүрүм тәшкилатиниң 2023-йиллиқ ахбарат мукапатиға еришкән.

“хитайниң тутуп туруш лагерлиридики чирайлар” дәп мавзу қоюлған бу программа BBC телевизийәсиниң тонулған мухбири җон содворсниң апторлиқида тәйярланған болуп, бу филимни ишләпчиқарғучилар қатарида йәнә шиветсийәдики уйғур тәтқиқатчи нийрула әлимаму бар икән.

“хитайниң тутуп туруш лагерлиридики чирайлар” намлиқ программа 2022-йили 5-айда BBC радийоси тәрипидин елан қилинғандин кейин зор ғулғула қозғиған иди. Мәзкур зор һәҗимлик мәхсус хәвәрдә, уйғур елидики лагерларға қамалған үч миңға йеқин тутқунниң фото сүрити, хитай сақчилириниң лагерларда қандақ “хизмәт” қилидиғанлиқи һәққидә нәқ мәйдандин тартилған сүрәтләр, лагерларни идарә қилишқа даир “қәтий мәхпий” дәп нам қоюлған һөкүмәт һөҗҗәтлири толиму җанлиқ оттуриға қоюлған.

Мәлум болушичә, BBC ниң бу кәң көләмлик хәвири йиллиқ ахбарат мукапатиниң “рәқәмлик таратқу қоллиниш” түри бойичә мукапатқа лайиқ көрүлгән.

Хәлқара кәчүрүм тәшкилатиниң даңлиқ ахбарат мукапати өткән бир йил бойичә елан қилинған вә тарқитилған әң яхши кишилик һоқуқ ахбаратчилиқини баһалап чиқидиған мукапат болуп, униң 2023-йиллиқ мукапат тарқитиш мурасими 26-април күни кәчтә әнгилийәдә өткүзүлгән.