“Xitayning tutup turush lagérliridiki chiraylar” mawzuluq programma mukapatqa érishken

En'giliye BBC radiyo-téléwiziyesining xelq'arada “Shinjang saqchi höjjetliri” dep élan qilin'ghan zor hejimlik tekshürüsh doklati heqqide ishligen mexsus xewiri, xelq'ara kechürüm teshkilatining 2023-yilliq axbarat mukapatigha érishken.

“Xitayning tutup turush lagérliridiki chiraylar” dep mawzu qoyulghan bu programma BBC téléwiziyesining tonulghan muxbiri jon sodworsning aptorliqida teyyarlan'ghan bolup, bu filimni ishlepchiqarghuchilar qatarida yene shiwétsiyediki Uyghur tetqiqatchi niyrula elimamu bar iken.

“Xitayning tutup turush lagérliridiki chiraylar” namliq programma 2022-yili 5-ayda BBC radiyosi teripidin élan qilin'ghandin kéyin zor ghulghula qozghighan idi. Mezkur zor hejimlik mexsus xewerde, Uyghur élidiki lagérlargha qamalghan üch minggha yéqin tutqunning foto süriti, xitay saqchilirining lagérlarda qandaq “Xizmet” qilidighanliqi heqqide neq meydandin tartilghan süretler, lagérlarni idare qilishqa da'ir “Qet'iy mexpiy” dep nam qoyulghan hökümet höjjetliri tolimu janliq otturigha qoyulghan.

Melum bolushiche, BBC ning bu keng kölemlik xewiri yilliq axbarat mukapatining “Reqemlik taratqu qollinish” türi boyiche mukapatqa layiq körülgen.

Xelq'ara kechürüm teshkilatining dangliq axbarat mukapati ötken bir yil boyiche élan qilin'ghan we tarqitilghan eng yaxshi kishilik hoquq axbaratchiliqini bahalap chiqidighan mukapat bolup, uning 2023-yilliq mukapat tarqitish murasimi 26-april küni kechte en'giliyede ötküzülgen.