Xitayning en'gliyediki elchisi Uyghur élide lagérlarning mewjutluqini ret qildi

Muxbirimiz irade
2019-10-03
Élxet
Pikir
Share
Print

Xitayning en'gliyede turushluq bash elchisi aldinqi küni en'gliyediki "Alem" ("Sky") xewerliri téléwiziyesining ziyaritini qobul qilghanda Uyghur élide lagérlarning mewjutluqini inkar qildi.

"Alem" xewerlirining programma riyasetchisi xitay elchisi lyu shawming bilen ötküzgen ziyariti jeryanida Uyghur élidiki lagérlar mesilisi üstide toxtalghan. U sözide özlirining muxbirlirining Uyghur élige biwasite barghanliqi we rayonda nechche yüz minglighan, hetta milyon etrapida kishining hazir tutup turush lagérlirida tutup turuluwatqanliqini éytti.

Xitay elchi bolsa uning sözini ret qilip, "Bu rast emes, shinjang dégen xitayning eng chong ölkilirining biri. U yerde kishiler paraghetning peyzini sürüwatidu" dégen.

Riyasetchi uningdin dawamliq "Bu tutup turush lagérlirida qanche kishi tutup turuluwatidu?" dep qayta sorighan. Lyu shawming buninggha jawaben "Ular tutup turush lagérliri emes, biz ularni'terbiyelesh merkizi', dep ataymiz. Bu térrorluqning aldini élish üchün élin'ghan tedbir. Shinjang dégen térrorluqning qurbani" dep gep yorghilatqan. Riyasetchi derhal ékranda qoyuluwatqan korla poyiz istansisida put-qolliri kishenlen'gen, közliri qara lata bilen baghlan'ghan halda yötkiliwatqan Uyghurlarning widiyosini körsitip turup "Siz bu orunlarni'qayta terbiye merkizi'deysiz. Bu kishiler közliri baghlan'ghan we kishenlen'gen halda ep méngilghan. Bu kishiler bundaq terbiyelesh merkezlirige özliri xalap baramdu?" dep soridi.

Lyu shawming bolsa bu körünüshning qayta terbiye merkezliri bilen alaqisi yoqluqini, buning türmidiki mehbuslarning yötkilishige a'it körünüshlikini ilgiri sürdi we "Bu tedbirlerning meqsiti köpchilik ahalining bixeterlikige kapaletlik qilish, bu dégen b d t ning térrorluqtin saqlinish siyasetlirining bir qismi" dep körsetti. U yene bu orunlarda kishilerning térrorluq, esebiylik idiyeliridin uzaqliship, kesip öginip jem'iyetke chiqidighanliqini ilgiri sürdi.

Halbuki, uning bu sözliri chet'ellerdiki Uyghur weziyitini közetküchilirining küchlük tenqidige uchridi. Ular tiwittérda buninggha qayturghan inkaslirida xitayning emdi pakitlarni yoshurup bolalmaydighanliqini we bu emeldarlarning bundaq sözlirining ularning kelgüside adalet aldida kishilik hoquqni depsende qilishqa yantayaq bolush jinayiti bilen sotlinishi üchün muhim pakit bolup qalidighanliqini eskertti.

Toluq bet