Уйғурлар дияридики башланғуч мәктәпләрдә хитай тили толуқ омумлишип болған

Үрүмчидә ечиливатқан “икки йиғин” мәзгилидә башланғуч йешидики уйғур өсмүрләрниң мәктәпкә кириш нисбити 99. 91 Пирсәнткә йәткәнлики нөвәттики маарип хизмитиниң зор утуқлири қатарида санап өтүлгән.

Шинхуа агентлиқиниң 15-январдики хәвиридә ейтилишичә, қәшқәр шәһәрлик 18-башланғуч мәктәпниң мудири лйән йүфей мухбирларниң зияритини қобул қилғанда “шинҗаңдики башланғуч мәктәпләрниң оқушқа кириш нисбити пүтүн мәмликәтниң һазирқи сәвийәсидин һалқип кәтти” дегән. У йәнә һөкүмәтниң зор күч билән қоллиши арқисида дөләт тилиниң омумлишиши әмәлгә ашқанлиқини, өзи мудирлиқ қиливатқан 18-башланғуч мәктәптики икки миңға йеқин оқуғучиниң пүтүнләй уйғур балилар болсиму уларниң дөләт тили өгинишидә ғайәт зор илгириләш вуҗудқа кәлгәнликини зоқ-шох билән сөзлигән.

Бу хил әһвал бай наһийәсидиму әйнән оттуриға чиқиватқан болуп, “шинҗаң гезити” ниң 15-январдики хәвиридә наһийәик 1-башланғуч мәктәптә пүтүн оқутқучи оқуғучиларниң дөләт тили өгиниватқанлиқи алаһидә хәвәр қилинған. Мәктәп мудири рәшидәмниң әһвал тонуштурушичә йәнә венҗу шәһириниң бай наһийәсигә ярдәм бериш хизмитиниң бир қисми сүпитидә мәзкур башланғуч мәктәптә “куңзи кутупханиси”, “куңзи фонди” қатарлиқлар тәсис қилинған. Шуниң билән биргә уйғур оқутқучиларни венҗуға берип дөләт тили өгинишкә тәшкиллигән.

Д у қ ниң баянатчиси дилшат решит бу һәқтә пикир қилип: “милйонлап уйғурлар лагерларға қамалғанлиқтин йүзмиңлиған уйғур өсмүрлири игә-чақисиз қеливатиду. Мушундақ яр-йөләксиз гөдәкләрни мәктәпкә йиғип хитайчә өгитиш һечқачан тәрәққият һесапланмайду. Әксичә сепи өзидин ассимилятсийә қилиш” деди.