Uyghurlar diyaridiki bashlan'ghuch mekteplerde xitay tili toluq omumliship bolghan

• Muxbirimiz eziz
  2019-01-15

Ürümchide échiliwatqan “Ikki yighin” mezgilide bashlan'ghuch yéshidiki Uyghur ösmürlerning mektepke kirish nisbiti 99. 91 Pirsentke yetkenliki nöwettiki ma'arip xizmitining zor utuqliri qatarida sanap ötülgen.

Shinxu'a agéntliqining 15-yanwardiki xewiride éytilishiche, qeshqer sheherlik 18-bashlan'ghuch mektepning mudiri lyen yüféy muxbirlarning ziyaritini qobul qilghanda “Shinjangdiki bashlan'ghuch mekteplerning oqushqa kirish nisbiti pütün memliketning hazirqi sewiyesidin halqip ketti” dégen. U yene hökümetning zor küch bilen qollishi arqisida dölet tilining omumlishishi emelge ashqanliqini, özi mudirliq qiliwatqan 18-bashlan'ghuch mekteptiki ikki minggha yéqin oqughuchining pütünley Uyghur balilar bolsimu ularning dölet tili öginishide ghayet zor ilgirilesh wujudqa kelgenlikini zoq-shox bilen sözligen.

Bu xil ehwal bay nahiyesidimu eynen otturigha chiqiwatqan bolup, “Shinjang géziti” ning 15-yanwardiki xewiride nahiye'ik 1-bashlan'ghuch mektepte pütün oqutquchi oqughuchilarning dölet tili öginiwatqanliqi alahide xewer qilin'ghan. Mektep mudiri reshidemning ehwal tonushturushiche yene wénju shehirining bay nahiyesige yardem bérish xizmitining bir qismi süpitide mezkur bashlan'ghuch mektepte “Kungzi kutupxanisi”, “Kungzi fondi” qatarliqlar tesis qilin'ghan. Shuning bilen birge Uyghur oqutquchilarni wénjugha bérip dölet tili öginishke teshkilligen.

D u q ning bayanatchisi dilshat réshit bu heqte pikir qilip: “Milyonlap Uyghurlar lagérlargha qamalghanliqtin yüzminglighan Uyghur ösmürliri ige-chaqisiz qéliwatidu. Mushundaq yar-yöleksiz gödeklerni mektepke yighip xitayche ögitish héchqachan tereqqiyat hésaplanmaydu. Eksiche sépi özidin assimilyatsiye qilish” dédi.