Uyghur élidiki bashlan'ghuch-ottura mekteplerde yanfon qollinish cheklinishi diqqet qozghidi

Uyghur aptonom rayonluq ma'arip tarmaqliri uqturush tarqitip, bashlan'ghuch-ottura mektepler ichide yanfon qollinishni birdek chekligen.

“Shinjang géziti” de tarqitilghan xewerdin qarighanda yéqinda Uyghur rayonluq ma'arip tarmaqliri “Bashlan'ghuch we ottura mektep oqughuchilirining köchme téléfonni bashqurushni kücheytish uqturushi” ni élan qilip, bashlan'ghuch we ottura mekteplerdin oqughuchilarning yanfonlirini mektep ichige élip kirishini qattiq kontrol qilishni telep qilghan.

Xewerde yene mundaq déyilgen: “Zörür bolmighuche oqughuchilarning yanfunini mektep ichige élip kirishige qet'iy yol qoyulmaydu. Alahide ehwallarda ata-anilar mektepke aldin iltimas qilishi kérek, ata-anilar mektepke yazma iltimas sun'ghandin kéyin ‛cheklik kirgüzüsh‚ prinsipi yolgha qoyulidu.”

Uyghur aptonom rayonluq ma'arip da'irilirining bunche jiddiy halda bashlan'ghuch-ottura mekteplerde yanfonni cheklishi diqqet qozghidi. Bu qararning peqet Uyghur élidiki mekteplerde yolgha qoyulushi bolupmu uning peyziwat nahiyeside bir xitay oqutquchining Uyghur oqughuchilarni sinipta qattiq urghan körünüshliri ashkarilinip ketkendin kéyin élin'ghanliqi chet'ellerdiki Uyghur közetküchilerning diqqitidin qachmidi.

2020-Yili 12-ayning axiri qeshqerning peyziwat nahiyesidiki melum mekteptiki xitay oqutquchining bir Uyghur oqughuchigha rehimsizlerche qattiq urghan körünüshi ijtima'iy taratqularda ashkarilinip kétip zor ghulghula peyda qilghanidi. Mezkur weqe radiyomiz teripidinmu sürüshtürülüp xewer qilin'ghan. Netijide peyziwat nahiyelik saqchi idarisi uqturush chiqirip, Uyghur oqughuchini urghan xitay oqutquchining tekshürülüwatqanliqini hem u Uyghur oqughuchining quliqining tayaq zerbiside yarilan'ghanliqini delilleshke mejbur bolghanidi.