Xitay Uyghur élida "Mejburiy emgekning yoqliqi" ni ilgiri sürdi

Muxbirimiz irade
2020-01-02
Élxet
Pikir
Share
Print

2-Yanwar küni xitayning hökümet awazi bolghan "Yershari waqti géziti" Uyghur élida "Mejburiy emgekni'ing yoqliqi" ni ilgiri sürdi. "Shinjangdiki musulman az sanliqlar mejburiy emgekke sélinmaydu" mawzusida élan qilin'ghan bu maqalide "Nyu-york waqtit géziti" ning bu heqtiki xewirining "Yalghanliqi" ilgiri sürülgen.

"Nyu-york waqit géziti" 30 dékabir küni Uyghur élidiki melum bir "Mejburiy emgek" lagéri ichidin yoshurun tartilghan sin körünüshlirini ashkarilap, xitay hökümitining rayonda pilanliq we programmiliq halda Uyghur we qazaq qatarliq yerlik milletlerni "Mejburiy emgek" ke séliwatqanliqini xewer qilghan idi. Ular xewiride da'irilerning aldi bilen bu kishilerni herbiy intizam we siyasiy idiye boyiche terbiyeleshtin ötküzüp, andin ularni zor kölemlik zawutlarda mejburiy emgekke salidighanliqini, bu ishchilarning xizmetni ret qilish hoquqi yoqliqini bildürgen idi. 

Xewerde bayan qilinishiche, "Nyu-york waqit géziti" érishken bu mexpi körünüshlerdiki zawutlarning türmidin héchqandaq perqi yoq bolup, qatmu-qat tosaqlar we égiz tamlar bilen toralghan bu zawut ichidikilerning öz aldigha heriket qilish imkani yoq iken. "Nyu-york waqit géziti" ning xewiride xitay hökümiti Uyghurlargha qarita "Özgertip yasash qurulushi" élip bérip, ikki milyon etrapida Uyghur qatarliq yerlik milletlerni lagérlargha qamighan bolsa, yene bir qsimlirini kiyim-kéchek pishshiqlap ishlesh, ayaq tikish za'utlirida we kocha süpürüsh xizmetlirige mejburiy qatnashturush arqiliq qamal qiliwatqanliqini bildürgen. 

Xitayning "Yershari waqit géziti" b yuqiriqi xewerning yalghanliqini ilgiri sürgen we "'nyu-york waqit géziti' pakitlarni burmilidi," dep eyibligen. Ular nurghun chong karxanilarning hazir hökümetning teshebbusi bilen Uyghur élige orunlishish arqiliq emeliyette Uyghur qatarliq yerlik milletlerning "Ishqa orunlishish we bay bolushi" gha yol échip bériwatqanliqini ilgiri sürgen. Emma mexpiy tartilghan widéyodiki bir ishchi özining ilgiriki kirimining buningdin nechche hesse yuqiriliqini éytqan. 

Nöwette Uyghur élidiki mejburiy emgek mesilisi xelq'arada diqqet qozghawatqan yene bir muhim témilarning birige aylandi.

Toluq bet