Уйғур районидики алий мәктәпләрниң оқутқучи-оқуғучилири америкаға қарши туруш һәққидә қәсәм ичкүзүлгән

Мухбиримиз әркин
2020-05-04
Share

Өткән йилниң ахирлирида уйғур районидики алий мәктәпләрдә мурасим өткүзүлүп, оқутқучи-оқуғучилар америкаға қарши туридиғанлиқи һәққидә қәсәм ичкүзүлгән.

Италийәдики «зимистан» ториниң ашкарилишичә, қәсәм ичиш паалийити америка авам палатасиниң өткән йили 12-айда «уйғур кишилик һоқуқ қанун лайиһәси» ни мақуллишиға қарши елип берилған икән. Оқутқучи вә оқуғучилар «вәтәнгә садиқ болидиғанлиқи, мәңгү хитай һөкүмити билән биргә туридиғанлиқи» вә «уйғур кишилик һоқуқ қанун лайиһәси» гә қәтий қарши туридиғанлиқи һәққидә қәсәм ичкән.

«Уйғур кишилик һоқуқ қанун лайиһәси» өткән йили 3-декабир күни америка авам палатасида мутләқ көп авазниң қоллишида мақулланған. «Қанун лайиһәси» дә уйғур районда кишилик һоқуқни дәпсәндә қиливатқан уйғур аптоном районлуқ парткомниң секретари чен чүәнго башчилиқидики хитай әмәлдарлириға ембарго йүргүзүш тәләп қилинған иди. «Зимистан» ториниң билдүрүшичә, шинҗаң университетиниң бир оқуғучиси «һәммәйлән қәсәм ичти, һечким рәт қилишқа җүрәт қилалмиди,» дегән.

Хәвәрдә йәнә бу хил һәрикәтниң қәшқәр университетидиму өткүзүлүп, «уйғур кишилик һоқуқ қанун лайиһәси» ниң тәнқид қилинғанлиқи тәкитләнгән. Хәвәрдә тәкитлинишичә, хитайниң «шинҗаңға ярдәм бериш программиси» ға қатнашқан бир хитай оқутқучи: «пүтүн оқутқучиларниң ‹уйғур кишилик һоқуқ қанун лайиһәси' гә қарши мақалә йезиши шундақла байрақ чиқириш мурасимида оқуғучиларға бу тоғрисида тәрбийә бериши тәләп қилинғанлиқини билдүргән.

Америка авам палатасиниң «уйғур кишилик һоқуқ қанун лайиһәси» ни 1 гә қарши 407 аваз билән мақуллиши хитайни қаттиқ биарам қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт