Uyghur rayonidiki aliy mekteplerning oqutquchi-oqughuchiliri amérikagha qarshi turush heqqide qesem ichküzülgen

Muxbirimiz erkin
2020-05-04
Élxet
Pikir
Share
Print

Ötken yilning axirlirida Uyghur rayonidiki aliy mekteplerde murasim ötküzülüp, oqutquchi-oqughuchilar amérikagha qarshi turidighanliqi heqqide qesem ichküzülgen.

Italiyediki "Zimistan" torining ashkarilishiche, qesem ichish pa'aliyiti amérika awam palatasining ötken yili 12-ayda "Uyghur kishilik hoquq qanun layihesi" ni maqullishigha qarshi élip bérilghan iken. Oqutquchi we oqughuchilar "Weten'ge sadiq bolidighanliqi, menggü xitay hökümiti bilen birge turidighanliqi" we "Uyghur kishilik hoquq qanun layihesi" ge qet'iy qarshi turidighanliqi heqqide qesem ichken.

"Uyghur kishilik hoquq qanun layihesi" ötken yili 3-dékabir küni amérika awam palatasida mutleq köp awazning qollishida maqullan'ghan. "Qanun layihesi" de Uyghur rayonda kishilik hoquqni depsende qiliwatqan Uyghur aptonom rayonluq partkomning sékrétari chén chüen'go bashchiliqidiki xitay emeldarlirigha émbargo yürgüzüsh telep qilin'ghan idi. "Zimistan" torining bildürüshiche, shinjang uniwérsitétining bir oqughuchisi "Hemmeylen qesem ichti, héchkim ret qilishqa jür'et qilalmidi," dégen.

Xewerde yene bu xil heriketning qeshqer uniwérsitétidimu ötküzülüp, "Uyghur kishilik hoquq qanun layihesi" ning tenqid qilin'ghanliqi tekitlen'gen. Xewerde tekitlinishiche, xitayning "Shinjanggha yardem bérish programmisi" gha qatnashqan bir xitay oqutquchi: "Pütün oqutquchilarning 'Uyghur kishilik hoquq qanun layihesi' ge qarshi maqale yézishi shundaqla bayraq chiqirish murasimida oqughuchilargha bu toghrisida terbiye bérishi telep qilin'ghanliqini bildürgen.

Amérika awam palatasining "Uyghur kishilik hoquq qanun layihesi" ni 1 ge qarshi 407 awaz bilen maqullishi xitayni qattiq bi'aram qilghan idi.

Toluq bet