Firansiye agéntliqi: "Uyghur diyarida meschitler ghayib bolghinidek ramazanliq tebriklermu anglanmaydighan boldi"

Muxbirimiz sada
2019-06-06
Élxet
Pikir
Share
Print

Xitay hökümiti Uyghur diyaridiki Uyghurlarning diniy erkinlikining toluq kapaletke ige boluwatqanliqi, meschitlerning qoghdiliwatqanliqini küchep teshwiq qiliwatqan bir peytte firansiye agéntliqi 6-iyun "Uyghur diyarida meschitler ghayib bolghinidek ramazanliq tebriklermu anglanmaydighan boldi" serlewhilik bir tepsiliy xewer élan qilindi. Xewerde xitay hökümiti rayonda chéqip tüzliwetken meschitler heqqidiki uchurlarni delil-ispatlar bilen otturigha qoydi.

Firansiye agéntliqining bu tepsiliy xewiri "Asiya bir" (Asia One) tor bétining 6-iyundiki sanigha bésilghan. Xewerdin melum bolushiche, firansiye agéntliqining muxbirliri 2017-yilidin buyan Uyghur diyaridin 36 meschitning chéqip tüzliwétilgenlikini sün'iy hemrah körünüshi arqiliq delillep chiqqan.

Xewerde firansiye agéntliqi muxbirlirining bu yil Uyghur diyarigha élip barghan ziyariti heqqidimu toxtalghan bolup, bu jeryanda xotendiki chéqiwétilgen bezi meschitlerning güllükke özgertilgenliki, bitonda piyadiler yoli yasilip, etrapida derexlerning tikilgenliki nuqtiliq bayan qilin'ghan.

Firansiye agéntliqining muxbirliri bu yil roza héyt küni (xitay waqti boyiche 5-iyun, charshenbe) qeshqer "Héytgah jamesi" ning imami memet jüme (ilgiri boghuzlap öltürülgen 'héytgah jamesi' ning imami jüme tahirning oghli) ni ziyaret qilghan. U sözide "Bu yerde ezeldin meschitler chéqilip baqmidi, hetta hökümitimiz qeshqerdiki bezi muhim meschitlerni qoghdash tizimlikige kirgüzdi," dégen.

Nöwette pütün dunyadiki musulmanlar roza héyt xushalliqigha chömgen bir mezgilde Uyghurlarning normal diniy pa'aliyetlirining cheklimige uchrishi we uzun yilliq tarixqa ige meschitlerning chéqilishi mesilisige qarita chet'ellerdiki kishilik hoquq pa'aliyetchiliri inkas qayturup, buning xitay hökümiti ötkende otturigha qoyghan islam dinini "Xitaychilashturush" urunushining roshen bir ipadisi ikenlikini ilgiri sürmekte.

Toluq bet