Qeshqer bilen xotenning hawa bulghinishi derijidin halqip ketken
2016.11.18
Xitay muhit tekshürüsh bash ponkitining ashkarilishiche, Uyghur ilining qeshqer, xoten rayonlirida jüme küni éghir hawa bulghinish ehwali körülüp, hawa süpiti körsetküchi 500 din éship ketken.
Shu küni hawa süpiti körsetküchi 500 din éship ketken sheherler ichide xoten we qeshqerdin bashqa yene, xitayning shi jyaju'ang, jinchang, wuwéy qatarliq 3 shehiri bar iken.
Xitayning hawa süpiti körsetküchi her kupmétir hawaning shu künlük terkibidiki chang tozang we ziyanliq maddilarning miqdarigha qarap, 5 derijige bölün'gen. 5- Derije hawa süpiti körsetküchi 300 din 500 giche bolghan pewqul'adde éghir bulghinish ehwalini körsitidu.
Qeshqer, xoten, we xitayning jinchang, wuwéy, shijyaju'ang sheherlirining jüme künki hawasi, körsetküchtiki pewqul'adde éghir bulghinish derijisidin halqip ketken. Xitay hawa süpiti körsetküchide qeyt qilishiche, eger hawaning bulghinishi 300 din éship ketse, bu yürek, nepes yoli késili bar bimarlarning hayatigha xewp yetküzüp, normal kishilerde belghem, ziqqe, yötel, gal aghriqi, köz aghriqi qatarliq ehwallarni keltürüp chiqidiken.
Dunya sehiye teshkilati yéqinda xitayni hawa bulghinishi ejellik éghir döletler tizimlikige kirgüzgen. Ularning körsitishiche, 2012-yili xitayda bir milyon adem bulghan'ghan hawa seweblik ölgen.