Uyghur éli da'iriliri “Muqimliqqa tehdit peyda qilghusi ehwallar” ni pash qilidighan ündidar supisi qurghan

Uyghur aptonom rayon da'iriliri ündidarda “Térrorluq” we “Xewpsizlik” ke chétilidighan weqelerni pash qilidighan bir supa tesis qilghan.

Junggo xewerler torining bu heqtiki xewiridin melum bolushiche, “Tinchliq öyi” dep isim bérilgen bu ündidar supisi arqiliq Uyghur élining muqimliqigha tehdit körsitiwatqan herqandaq bir ehwal heqqide uchur yetküzgenler 200 yüen bilen mukapatlinidiken. Yuqiriqi bu munber Uyghur aptonom rayonluq da'iriler ilgiri sürüwatqan “Térrorluqqa qarshi xelq urushi” ning bir parchisi bolup hésablinidighan bolup, da'iriler nöwette etigenlik bayraq chiqirish murasimliri we töwen'ge chüshken kadirlar arqiliq barliq ammini bu ündidar supisini qoshuwélishqa ündimektiken.

Uyghur aptonom rayonluq da'iriler 2017-yilining bashlirida bu xildiki pash qilish élanlirini köplep tarqatqan. Herqaysi yerlik organlarmu öz aldigha mana mushundaq pash qilish supilirini tesis qilghan we her bir uchurning qimmitige qarap 500 milyon yüen'giche mukapat békitken idi.

Xitay hökümitining mana mushu usullar bilen Uyghur élide ikki milyondin oshuq kishini lagérgha qamighanliqi, lagér sirtidikilerningmu qattiq qamal astida yashawatqanliqi melum boluwatqan bir shara'itta da'irilerning yene néme üchün bundaq bir munberni tesis qilghanliqi namelum. Biraq chet'ellerdiki Uyghur közetküchiler buning teshwiqat meqsiti barliqini, chünki xitayning Uyghur élide yürgüzüwatqan siyasetlirini u yerde “Térrorluq tehditi” barliqini ilgiri sürüsh arqiliq aqlawatqanliqini bayan qildi.