Хитай даирилири уйғур районидики бәзи наһийәләргә көпләп заседатил қобул қилди

Хитай даирилири йеқинда елан чиқирип, уйғур райониниң җәнубидики бәзи наһийәлик сот мәһкимилиригә көпләп заседатил қобул қилған.

Хәвәрдә, бу наһийәләрдә көпләп заседатил қобул қилишниң сәвәби чүшәндүрүлмигән болсиму, лекин көзәткүчиләр буниң лагердики тутқунларниң кәң көләмлик сотлиниши билән мунасивәт болуши мумкинликини илгири сүрмәктә. Кишилик һоқуқ тәшкилатлириниң илгири сүрүшичә, нөвәттә хитай һөкүмити лагердики уйғурниң бир қисмиға қамақ җазаси берип, уларни ичкиридики түрмиләргә йөткимәктә икән.

Америка һөкүмити бу лагерларда 800 миңдин 2 милйонғичә уйғур вә башқа мусулман аз санлиқ милләтләрниң тутуп турулуватқанлиқини билдүргән.

Ават наһийәлик әдлийә идариси йеқинда мәзкур наһийәгә 96 нәпәр заседатил қобул қилған. Заседатиллар мәзкур наһийәниң һәр қайси кәнт, иҗтимаий район вә идарә җәмийәтлиридин талланған.

Мәлум болушичә, 96 нәпәр засидатилниң мутләқ көп қисми уйғур болуп, уйғурларниң көп санлиқни тәшкил қилиши диққәт қозғиди. Охшаш мәзгилдә йәнә кәлпин наһийәси 23 нәпәр заседални қобул қилған болуп, уларниңму мутләқ көп қисмини уйғурлар игилигән.

Хәвәрдә, бу 23 нәпәр засидатилниң көпәйтип қобул қилинғанлиқи тәкитләнгән болсиму, әмма хәвәрдә бурун қанчә заседатил қобул қилинғанлиқи көрситилмигән.

Бәзи кишилик һоқуқ тәшкилатлириниң илгири сүрүшичә, хитай һөкүмити өткән йили йиғивелиш лагерлирида тутқунларни түркүм-түркүмләп қамақ җазаси берип, гәнсу, ички моңғул, шәнши, хейлоңҗяң қатарлиқ җайлардики түрмиләргә йөткигән. Йеқинда бу өлкиләрниң бәзи түрмилиридики хитай җинайәтчиләрниң йөткиветилип, уларниң орниға уйғур тутқунларниң йөткәп келингәнлики дәлилләнгән иди.