Xitay da'iriliri Uyghur rayonidiki bezi nahiyelerge köplep zasédatil qobul qildi

Muxbirimiz erkin
2019-02-06
Élxet
Pikir
Share
Print

Xitay da'iriliri yéqinda élan chiqirip, Uyghur rayonining jenubidiki bezi nahiyelik sot mehkimilirige köplep zasédatil qobul qilghan.

Xewerde, bu nahiyelerde köplep zasédatil qobul qilishning sewebi chüshendürülmigen bolsimu, lékin közetküchiler buning lagérdiki tutqunlarning keng kölemlik sotlinishi bilen munasiwet bolushi mumkinlikini ilgiri sürmekte. Kishilik hoquq teshkilatlirining ilgiri sürüshiche, nöwette xitay hökümiti lagérdiki Uyghurning bir qismigha qamaq jazasi bérip, ularni ichkiridiki türmilerge yötkimekte iken.

Amérika hökümiti bu lagérlarda 800 mingdin 2 milyon'ghiche Uyghur we bashqa musulman az sanliq milletlerning tutup turuluwatqanliqini bildürgen.

Awat nahiyelik edliye idarisi yéqinda mezkur nahiyege 96 neper zasédatil qobul qilghan. Zasédatillar mezkur nahiyening her qaysi kent, ijtima'iy rayon we idare jem'iyetliridin tallan'ghan.

Melum bolushiche, 96 neper zasidatilning mutleq köp qismi Uyghur bolup, Uyghurlarning köp sanliqni teshkil qilishi diqqet qozghidi. Oxshash mezgilde yene kelpin nahiyesi 23 neper zasédalni qobul qilghan bolup, ularningmu mutleq köp qismini Uyghurlar igiligen.

Xewerde, bu 23 neper zasidatilning köpeytip qobul qilin'ghanliqi tekitlen'gen bolsimu, emma xewerde burun qanche zasédatil qobul qilin'ghanliqi körsitilmigen.

Bezi kishilik hoquq teshkilatlirining ilgiri sürüshiche, xitay hökümiti ötken yili yighiwélish lagérlirida tutqunlarni türküm-türkümlep qamaq jazasi bérip, gensu, ichki mongghul, shenshi, xéylongjyang qatarliq jaylardiki türmilerge yötkigen. Yéqinda bu ölkilerning bezi türmiliridiki xitay jinayetchilerning yötkiwétilip, ularning ornigha Uyghur tutqunlarning yötkep kélin'genliki delillen'gen idi.

Toluq bet