Qeshqer tewesidiki nawayliq kespi pütünley xitay shirketlirining bashqurushigha ötken

Muxbirimiz eziz
2021-12-22
Share

“Shinjang géziti” ning 22-dékabirdiki xewiride éytilishiche, nöwette qeshqerdiki nawayliq kespi pütünley kölemleshken xitay shirketlirining kontrolluqida bolup, “Her küni 10 milyon nan yéqilidu” déyiliwatqan bu kesip toluq mashinilishish basquchigha ötken.

Xewerde éytilishiche, qeshqerdiki “Wenfudun yémek-ichmek shirkiti” ning nawayliq séxliri pütünley mashinilashqan bolup un, süt, xémirturuch qatarliq xuruchlarni arilashturup xémir yughurushtin tartip nan yéqish we yéqilghan nanlarni orap-qachilashqiche bolghan pütkül jeryan mushu mashinida tamamlinidiken. Shirket diréktori lyang chaw bu heqte söz qilip “Bu séxta her sékontigha 80 toqach nan chiqiralaymiz. Yéqinda buni özgertip islah qilish arqiliq bu sanni 100 ge yetküzmekchimiz” dégen.

Xewerde éytilishiche, qeshqerdiki mushu xil nawayliq shirketliri hazir 11 milyon nan yéqish sewiyesige yetken bolup, bu nanlarning zor bir qismi Uyghur diyaridiki herqaysi jaylargha ewetilidiken, yene bir qismi bolsa xitay ölkilirige yollinidiken. Xitay tashqi ishlar ministirliqining bayanatchisi jaw lijyen bu halni maxtap özining tiwéttér bétide bu xil yüzlinishni hembehirligen. Shundaqla “Shinjangliqlar bir kün gösh yémise chidaydu, emma bir kün nan yémise turalmaydu” dégen.

Uyghurlarning kündilik hayati bilen zich baghlinishliq bolghan, shundaqla iqtisadiy tapawitining bir muhim menbesi bolghan nawayliq kespining xitay shirketlirining kontrolluqigha ötüp kétishi nöwette köpligen so'allarni peyda qilmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet