Канадалиқ дохтур: «уйғурларға қаритилған қанунсиз ички әза көчүрүшкә хатимә берилиши керәк»

Мухбиримиз әркин
2020-03-13
Елхәт
Пикир
Share
Принт

Канадалиқ дохтур, кишилик һоқуқ паалийәтчиси фозия алви канададики бир медитсина торида мақалә елан қилип, уйғурларға қаритилған ички әза көчүрүш қилмишиға хатимә берилиши керәкликини чақириқ қилди. У хитайниң сияси мәһбуслар вә аз санлиқ милләт тутқунлириниң ички әзалирини көчүрүп еливатқанлиқиға даир йетәрлик пакитларниң барлиқини билдүрүп, униң илгири фалунгоңчиларниң ички әзалирини алғанлиқи, лекин һазир мусулман уйғурлар бу хил қилмишниң нишаниға айланғанлиқини тәкитлигән.

Униң тәкитлишичә, хитай дуняда иқтисади күчлүк дөләт болсиму, лекин ғәрб демократик дөләтлиридики дохтурлар бу хил вәһшиликкә тохта дейиши керәк икән. У: «мән бу йәрдики һәр бир кишиниң төвәндики чақириқларни қоллап, алберта өлкисидики дохтурларни күчимизниң йетишичә хитайдики қанунсиз ички әза көчүрүшни тохтитишқа, ирқий қирғинчилиқтин пайдиға еришишкә хатимә беришкә ярдәмдә болушқа чақиримән» дегән. Униң тәкитлишичә, аз санлиқ милләтләр яки аҗиз шәхс вә гуруппиларниң ички әзалирини көчүрүшкә иштирак қилған, униңға һәмкарлашқан дохтур вә органларни қоллимаслиқ, канада һөкүмити хитайдәк дөләтләргә берип, ички әза көчүрүшни қанунсиз, дәп елан қилиши, шундақла канада һөкүмити кишиләрниң бу хил қилмишларға иштирак қилған дохтурни паш қилишиға йол қоюши керәк икән. Бу, фозия алвиниң тунҗи қетим бу чақириқни чиқириши әмәс. У өткән йилиму канаданиң алберта өлкисидики бир қисим дохтурлар билән калгари шәһридә ахбарат йиғини өткүзүп, бу чақириқни оттуриға қойған. Нөвәттә хәлқара җәмийәтниң лагерларда из-дерәксиз ғайип болған уйғурларниң ички әза әткәсчиликиниң қурбаниға айланғанлиқиға болған гумани күнсери күчәймәктә.

Пикирләр (0)
Share
Толуқ бәт