Uyghur rayonida “Bash nishanni chöridesh” chaqiriqidin kéyin, pasport yighiwélish herikiti bashlan'ghan

Muxbirimiz shöhret hoshur
2016-10-19
Share

Ijtima'iy taratqulardin melum bolushiche, xitay da'iriliri Uyghur rayonida pasport yighiwélish heqqide keng-kölemde uqturush tarqatqan.

Qumulning dungxé rayonluq saqchixanisi teripidin tarqitilghan uqturushta, burun pasport alghanlarning pasportlirini 18-öktebirdin burun saqchigha tapshurushi buyrulghan, eger tapshurulmisa pasport igilirige awarichilik bolidighanliqi eskertilgen.

Manas nahiyilik saqchi idarisi 10-öktebir küni tarqatqan uqturushta 11-öktebirdin bashlap pasport béjirishning toxtitilidighanliqi eskertilgen. Féysbokta resimlik halda tarqiliwatqan uqturushlardin yene birqanchisi shixenze we ürümchidiki saqchi orunliri teripidin chiqirilghan bolup, bularda hetta pasport waqtida qayturulmisa aqiwitige özi ige bolush heqqide tehditlik agahlandurushlar bérilgen.

Pasport yighiwélish heqqidiki bu jiddiy we keng da'irilik uqturush muhajirettiki Uyghur közetküchilerning diqqitini tartti. Közetküchiler, bu heriketning Uyghur rayonining yéngi emeldari chén chüen'goning hemme ishta bash nishanni chöridesh chaqiriqigha bina'en élip bériwatqanliqini ilgiri sürdi. Shinjang gézitide élan qilin'ghan mezkur chaqiriqta, ebediy eminliktin ibaret bash nishan'gha paydiliq bolghan herqandaq ishni qilish, paydisiz bolghan herqandaq ishni qilmasliq teshebbus qilin'ghan idi.

Bu heqte pikir bayan qilghan amérikidiki siyasiy közetküchi uchqunjan ependi, xitay da'irilirining Uyghurlarning tashqi dunya bilen uchrishishini burundinla muqimliqqa paydisiz dep qarap kéliwatqanliqini eskertti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet