Xitay hökümet emeldarining "Ramizan mezgilide ashxana, réstoranlar normal échilidu" dégen sözi tenqidke uchridi

Muxbirimiz méhriban
2016-06-02
Share

Xitay hökümiti 2-iyun peyshenbe küni muxbirlargha bayanat bérip, "Shinjangdiki diniy étiqad erkinliki" heqqide aq tashliq kitab élan qilghanliqini bildürdi. Emma ramizan harpisida échilghan xitayning diniy erkinlik siyasitini aqlaydighan bu yighinda, Uyghur aptonom rayonining diniy ishlar emeldarining "Ramizan mezgilide ashxana, réstoranlar normal échilidu" dégen sözi tenqidke uchridi.

Melum bolushiche, mezkur bayanat bérish yighinida, muxbirlarning so'aligha jawab bergen Uyghur aptonom rayonluq diniy ishlar idarisining bashliqi turghan pida: "Ramizan mezgilide ashxana, réstoranlar normal échilidu. Halal réstoran, ashpuzullarni échish mesilisini ashxana xojayinliri özi békitidu. Buninggha cheklime qoyulmaydu" dégen.

Xitay hökümitining ramizan mezgilide Uyghurlarni ashxana, réstoranlarni normal échishqa mejburlash, hökümet xizmetchiliri we oqughuchilarning roza tutushini cheklesh, mektep idrilarda mejburiy tamaq yégüzüsh qilmishliri üzlüksiz eyibleshke uchrap kéliwatqan bolup, xitay hökümet emeldarining yuqiriqi sözi xelq'ara taratqularda élan qilin'ghandin kéyin tenqidke uchridi.

Dunya Uyghur qurultiyi bayanatchisi dilshat rishit xitay emeldarining sözini tenqidlep: "Xitayning ramizan mezgilide ashxana, réstoranlar normal échilidu dégen sözila da'iriler élan qilghan Uyghurlarning diniy étiqad erkinliki heqqidiki aq tashliq kitabtiki ibarilerning yalghanliqini ispatlap turuptu. Emeliyette ramizan mezgilide musulmanlarning ashxanilirini échish‏-achmasliq hoquqi tartiwélin'ghan. Xitay hökümet da'iriliri halal réstoran, ashpuzullarni échish mesilisini ashxana xojayinlirining özi békitidu dégen bu sözlirini öz heriketliri bilen ispatlishi kérek" dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet