Uyghur rayonidiki nahiyelerge saqchi we "Idiyewi terbiye yétekchisi" qobul qilish dawamlashmaqta

Muxbirimiz erkin
2019-03-04
Élxet
Pikir
Share
Print

Xitay da'iriliri Uyghur rayonidiki nahiyelerge saqchi we "Idiyewi terbiye yétekchisi" qobul qilish élani chiqirip, amanliq we idiyewi kontrolluq jehettiki boshluqni toldurushni dawamlashturmaqta.

Yéqinda bayin'gholinning lopnur we chaqiliq nahiyesi uqturush chiqirip, saqchi we yéza yashlirining "Idiyewi terbiye yétekchisi" qobul qilidighanliqini élan qilghan.

Melum bolushiche, chaqiliq nahiyesi mezkur nahiyening j x orunlirigha 100 neper xizmetchi, lopnur nahiyesi 14 neper "Yéza yashlirining idiyewi terbiye yétekchisi" ni qobul qilidiken. Lékin xewerde, ularning konkrét qandaq wezipe atquridighanliqi tilgha élinmighan.

Chaqiliq nahiyesi yuqiriqi uqturushning "Partiye 19‏-qurultiyining rohini izchillashturup, ijtima'iy muqimliq we uzun muddetlik eminlikini ishqa ashurush telipige bina'en" chiqirilghanliqi, lopnur nahiyesi "Oblastning yéza yashlirining idiyewi terbiye yétekchilirini qobul qilish xizmiti heqqidiki uqturushi" gha bina'en 14 neper yétekchi qobul qilish testiqlan'ghanliqini bildürgen. Lékin bu peqet, bu yilning deslepki 3 éyida bayin'gholin oblastidiki her qaysi nahiyelerge qobul qilin'ghan xadimlarning az bir qismi xalas.

Uyghur kishilik hoquq teshkilatlirining ilgiri sürüshiche, xitay hökümiti ziyaliy, kadir, diniy zat we kespiy xadimlarning öz ichige alghan 2 milyondek Uyghur, qazaq we bashqa musulman xelqlerni lagérlargha qamap, ularning ornini xitaylar bilen toshturmaqta iken.

Chaqiliq we lopnur nahiyelirining uqturushi bayin'gholin oblasti atalmish "Qara guruhlar" we "Rezil küchler" ni omumiy yüzlük tazilash herikiti qozghighan bir waqitta chiqirilghan.

Kishilik hoquq teshkilatlirining ilgiri sürüshiche, mezkur heriketning nishani "Ikki yüzlimichi" kadirlar, diniy zatlar, erzdarlar, i'ane toplighan xeyr-saxawetchiler, asasi qatlamgha suqunup kiriwalghan atalmish "Bölgünchi" küchlerge qaritilghan iken.

Toluq bet