Уйғур елидики җамаәт хәвпсизлик тармақлири хитай бойичә хизмәт көрсәткән дәп баһаланған

Мухбиримиз ирадә
2022.05.26
Share on WhatsApp
Share on WhatsApp

Б д т кишилик һоқуқ алий комиссари мишел бачелитниң хитай зиярити техи ахирлашмайла, хитай һөкүмити мәмликәт бойичә җамаәт хәвпсзлики сестимисидики хизмәт көрсәткән орун вә шәхсләрни мукапатлиған. Буларниң ичидә уйғур аптоном райони вә биңтуәнгә қарашлиқ сақчи системисидики бир түркүм коллектип вә шәхсләр бар икән.

“тәңритағ тори” ниң хәвиригә қариғанда, уйғур аптоном районидин қарамай шәһәрлик җамаәт хәвпсизлики идариси җәрәнбулақ районлуқ шөбә идариси вә дөрбилҗин наһийәлик җамаәт хәвпсизлики идариси хитай бойичә “мунәввәр җамаәт хәвпсизлики идариси” болуп баһаланған.

Ғулҗа наһийәлик җамаәт хәвпсизлики идариси чарлаш, алдини елиш-тизгинләш чоң әтритиниң чоң әтрәт башлиқи хе юңҗүн қатарлиқ сәккиз киши “мәмликәт бойичә алаһидә дәриҗилик мунәввәр сақчи” болуп баһаланған; үрүмчи шәһәрлик җамаәт хәвпсизлики идариси мидуң районлуқ шөбә идариси давшяң йоли сақчиханиси қатарлиқ 19 коллектип хитай бойичә “мунәввәр җамаәт хәвпсизлики асасий қатлам орни” болуп баһаландиған.

Хәвәргә қариғанда, бу нөвәт хитай бойичә мукапатланған сақчи идариси вә сақчилар ичидә уйғур елида турушлуқ биңтуәнгә тәвә коллектип вә шәхсләр асаслиқ орунни игилигән. Уларниң ичидә шинҗаң ишләпчиқириш-қурулуш биңтуәни 2-дивизийәси қарашәһәр боз йәр өзләштүрүш райони җамаәт хәвпсизлики идариси, 10-дивизийә бейтүн шәһәрлик җамаәт хәвпсизлики идариси чағантоңгә сақчиханиси, 3-дивизийә қәшқәр боз йәр өзләштүрүш райони җамаәт хәвпсизлики идариси җяхе базарлиқ сақчиханиси қатарлиқ орунлар вә ундин башқа һәрқайси дивизийәләргә қарашлиқ сақчи органлиридики сақчи хадимлири бар икән.

Бундин башқа йәнә хитай җамаәт хәвпсизлики алаһидә вәзипә тармақлири бойичә, қәшқәр вилайәтлик җамаәт хәвпсизлики идариси алаһидә вәзипә тармақ әтрити “мәмликәт бойичә мунәввәр җамаәт хәвпсизлики асасий қатлам орни” болуп баһаланған.

Диққәт қозғайдиғини, мукапат тапшурувалған сақчи органлири вә хадимлири асасән уйғурлар зич олтурақлашқан җайларға тәвә болуп, бу орган вә шәхсләрниң йеқинқи йиллардин буян хитай һөкүмитиниң уйғурларға қаритиватқан зулум сиясәтлиридә актип рол алғанлиқи мөлчәрләнмәктә.

Хитай җамаәт хәвпсизлик министири го шеңкун нәмуничиларни тәқдирләш йиғинида қилған сөзидә “пүтүн мәмликәттики җамаәт хәвпсизлики органлири ши җинпиң йеңи дәвр хитайчә сотсиялизм идийәсини йетәкчи қилип, хәвп-хәтәрниң алдини елиш, бихәтәрликкә капаләтлик қилиш, муқимлиқни қоғдаштики түрлүк хизмәтләрни пүтүн күч билән яхши ишлиши керәк” дегән.

Йеқинда “хитай сақчи һөҗҗәтлири” намидики хитайниң лагер тутқунлириға алақидар бир йүрүш мәхпий һөҗҗәтлири ашкариланған, хәлқара ахбаратларда бу һәқтики инкаслар қизиқ нуқта болуватқан бир пәйттә, хитайниң уйғурларға қаратқан ирқий қирғинчилиқида биваситә қоли болған уйғур райони вә биңтуәнгә қарашлиқ сақчиханилар вә сақчи хадимлириниң мукапатлиниши, җиддий диққәт қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.