Xitay sayahet orunliri xitaylargha pul bérip Uyghur rayonini sayahet qildurushni bashlighan

Xitay taratqulirining yéqinda chiqarghan xewiridin melum bolushiche, xitayning jéjyang ölkisi teyju shehiri 8 milyon yüen “Shinjanggha yardem bérish meblighi” ajritip, “2021-Yilliq tey'ér shinjang sayahiti” pilanini yolgha qoyghan. Bu pilan boyiche jéjyang teyjo shehiridin aqsudiki aral shehirige sayahetke baridighanlargha 1000 yüen yardem bérilidiken.

Bu pa'aliyet 2021-yil 4-ayning 1-künidin bashlinip, 2021-yil 12-ayning 31-küni axirlishidiken. Bu jeryanda xitay sayahetchiler aqsuning aral shehirige bérip bir hepte sayahet qilidiken. Xewerde éytilishiche, ötken yilimu teyju sayahet shirkiti “Ming kishilik aral sayahiti” uyushturghan bolup, “Ünümi alahide yaxshi” bolghan iken.

Tehlilchilerning qarishiche, ichkiri xitaydiki sayahet orunliri bundaq sayahetlerni pilanlashta xitay hökümitining qollishigha érishken bolup, xitaylarni Uyghur rayonigha köplep jelp qilish üchün ulargha pul bérip yaki bahada étiwar bérip bu rayonni sayahet qilduridiken. Xitaylarning bu rayon heqqide shekillinip qalghan alliqandaq wehimilirini yoqitip, ularning könglini xatirjem qilish we bu rayon'gha köchüshke qiziqturush üchün barliq charilerni ishqa salidiken.