Хитай тарим вадисини зор көләмлик көктатчилиқ базисиға айландурмақчикән

Мухбиримиз әзиз
2022.02.16

Хитай һөкүмитиниң башқуришидики “шинҗаң гезити” ниң 16-февралдики хәвиридә ейтилишичә, уйғур аптоном районлуқ йеза игилики-йеза назаритиниң мунасивәтлик хадимлири “җәнубий шинҗаң районидики көктатчилиқ йәр мәйданиниң нисбити илгири пүтүн шинҗаң көктатчилиқ йәр мәйданиниң төт үлүшини игилигән болса, һазир сәккиз үлүшини игиләйдиған болди” дегән.

Хәвәрдә ейтилишичә, тарим вадисиниң иссиқ һава килимати түпәйлидин йәрниң шорлишиши еғир болуп кәлгән. Бу болса көктатчилиққа пәқәтла мас кәлмәйдиған бир муһитни пәйда қилған икән. Әмма 2020-йилидин башлап парникта көктат өстүрүш омумлашқандин кейин, бу һал өзгәргән икән. Шундақла парникта өстүрүлидиған көктатларниң түрлириму көпәйгән. Буниң билән уйғур дияридики сәккиз көктатчилиқ ширкити 2021-йилила 150 миң тоннидин артуқ көктатни сиртқа йөткәп сатқан.

Мәлум болушичә, хитай һөкүмитиниң өткән бирнәччә йилда уйғур диярини хитайниң санаәт вә йеза-игилик ишләпчиқириш базиси қилип өзгәртмәкчи болуши, җүмлидин 2021-йили уйғур дияриниң хитайдики әң чоң чошқа беқиш базиси вә навайлиқ базисиға айландурулушқа башлиғанлиқи, буниңдин илгирики енергийә вә хам әшя базиси болуштәк реаллиққа қошулған йеңи мәзмунлар болуп қалған иди. Бу җәрянда уйғур дияридики йәрлик хәлққә һечқандақ иқтисадий мәнпәәт йәтмәйла қалмастин, ғайәт зор көләмлик бу ишләпчиқириш паалийәтлири уйғур дияриниң муһитини мислисиз дәриҗидә вәйран қилидиғанлиқи һәр саһә кишилирини изчил әндишигә селип кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.