Xitay tarim wadisini zor kölemlik köktatchiliq bazisigha aylandurmaqchiken

Xitay hökümitining bashqurishidiki “Shinjang géziti” ning 16-féwraldiki xewiride éytilishiche, Uyghur aptonom rayonluq yéza igiliki-yéza nazaritining munasiwetlik xadimliri “Jenubiy shinjang rayonidiki köktatchiliq yer meydanining nisbiti ilgiri pütün shinjang köktatchiliq yer meydanining töt ülüshini igiligen bolsa, hazir sekkiz ülüshini igileydighan boldi” dégen.

Xewerde éytilishiche, tarim wadisining issiq hawa kilimati tüpeylidin yerning shorlishishi éghir bolup kelgen. Bu bolsa köktatchiliqqa peqetla mas kelmeydighan bir muhitni peyda qilghan iken. Emma 2020-yilidin bashlap parnikta köktat östürüsh omumlashqandin kéyin, bu hal özgergen iken. Shundaqla parnikta östürülidighan köktatlarning türlirimu köpeygen. Buning bilen Uyghur diyaridiki sekkiz köktatchiliq shirkiti 2021-yilila 150 ming tonnidin artuq köktatni sirtqa yötkep satqan.

Melum bolushiche, xitay hökümitining ötken birnechche yilda Uyghur diyarini xitayning sana'et we yéza-igilik ishlepchiqirish bazisi qilip özgertmekchi bolushi, jümlidin 2021-yili Uyghur diyarining xitaydiki eng chong choshqa béqish bazisi we nawayliq bazisigha aylandurulushqa bashlighanliqi, buningdin ilgiriki énérgiye we xam eshya bazisi bolushtek ré'alliqqa qoshulghan yéngi mezmunlar bolup qalghan idi. Bu jeryanda Uyghur diyaridiki yerlik xelqqe héchqandaq iqtisadiy menpe'et yetmeyla qalmastin, ghayet zor kölemlik bu ishlepchiqirish pa'aliyetliri Uyghur diyarining muhitini mislisiz derijide weyran qilidighanliqi her sahe kishilirini izchil endishige sélip kelgen idi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar