Uyghur diyarida omumiy xelqning salametlik ehwali 71 milyon adem qétim tekshürülgen

Muxbirimiz irade
2020-01-02
Share

Uyghur diyarida ötken birnechche yilda toxtawsiz dawam qilghan "Heqsiz salametlik tekshürüsh" pa'aliyiti heqqide türlük melumat we xewerler otturigha chiqip kelgen idi.

"Shinjang géziti" ning 2-yanwar küni tarqatqan xewirige qarighanda, 2019-yili Uyghur aptonom rayoni miqyasida yene 17 milyon'gha yéqin adem salametlik tekshürüshige qatnashturulup, ularning salametlik arxipi turghuzulghan. Xewerde éytilishiche, buning bilen mezkur xizmet bashlan'ghandin buyanqi 4 yil ichide salametliki tekshürülgen we arxipi turghuzulghan kishilerning sani 71 milyon 800 ming adem qétimdin éship, sélin'ghan meblegh 5 yérim milyard yüen'ge yetken. 

Gerche xitay da'iriliri omumyüzlük salametlik tekshürüsh xizmitini hökümetning "Xelq turmushini yaxshilash" jehettiki xizmetlirining biri qatarida teshwiq qiliwatqan bolsimu, emma chet'ellerdiki musteqil organlarning bu heqtiki doklatliri bashqiche nuqtini otturigha qoymaqta. Yeni bu doklatlarda Uyghur élida izchil dawam qiliwatqan "Atalmish heqsiz salametlik tekshürüshi" ning emeliyette ichkiy eza etkeschiliki bilen munasiwiti barliqi algha sürülmekte. 

Yéqinda en'giliyening "Muhapizetchi" géziti awstraliye döletlik uniwérsitétining doktor aspiranti mettiw robértson bashchiliqida élip bérilghan bir tetqiqat netijisini élan qilghan idi. Xewerde éytilishiche, yuqiriqi bu tetqiqat netiji'isdin qarighanda, xitay hökümitining hélihem mejburiy halda ichkiy eza yötkewatqanliqi we buni yoshurush üchün saxta sanliq melumat yasawatqanliqi heqqide küchlük pakitlar bar iken. Bu pakitlar xitay hökümitining jinayetchilerning ichkiy organlirini, bolupmu Uyghurlarning ichkiy organlirini mejburiy yötkewatqanliqi heqqidiki gumanlarni yenimu küchlük asas bilen teminleydiken. Chünki xitayda yiligha az dégende 60 ming ichkiy eza yötkesh opératsiyesi élip bériliwatqan bolup, bunche köp insan ichkiy ezalirining qeyerdin kelgenliki küchlük guman peyda qilidiken. 

En'gliyediki "Xitay kollégiyesi" namliq bir musteqil organ 2019-yili 24‏-séntebir b d t kishilik hoquq kéngishide guwahliq bérip, xitay hökümitining Uyghurlar we falun'gung murtlirining ichkiy ezalirini mejburiy élip köchürüwatqanliqi we sétiwatqanliqini bildürgen. Bu Uyghurlarning xitaydiki ichkiy eza yötkesh qilmishining ziyankeshlikige uchrawatqanliqining tunji qétim b d t da otturigha qoyulushi bolup hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet