Uyghur élide échiliwatqan ikki qurultayda “Muqimliq we menggülük eminlik” tedbirlirini dawamlashturush tekitlen'gen

Muxbirimiz irade
2020.01.08

Uyghur aptonom rayonida nöwette “Aptonom rayonluq 13-nöwetlik xelq qurultiyi 3-yighini” we “Siyasiy kéngesh 12-nöwetlik komitéti 3-yighini 2-omumiy yighini” din ibaret ikki omumiy yighin échiliwatqan bolup, bu yighinlarda birdek “Ijtima'iy muqimliq we ebediy eminlik bash nishanini dawamliq izchillashturush” tekitlen'gen.

Tengritagh torining “Ikki yighin” heqqide 8-yanwar küni tarqatqan xewerliride körsitilishiche, ikki yighinda söz qilghan partkom sékritari chén chüen'go we Uyghur aptonom rayon re'isi shöhret zakir, siyasiy kéngesh re'isi nurlan ebilmejin qatarliqlar birdek rayonning nöwettiki “Muqim we tinch” weziyitige kapaletlik qilishni tekitlep, nöwette ijra qiliniwatqan muqimliq siyasetlirining qet'iy dawamlashturulidighanliqini bildürgen. 

Diqqet qozghaydighini, yighin'gha herqaysi jaylardin kelgen wekiller guruppa yighinlirida birdek amérikaning Uyghur kishilik hoquq qanun layihesini eyibleshke sélin'ghan bolup, tengritagh torining ikki yighin heqqidiki xewer sehipiliri her sahe, her jaylardin kelgen xelq wekillirining amérikagha qaratqan tenqidliri bilen toshup ketken. 

Ularning ilgiri sürüshiche, “Wekiller amérikaning ‛shinjangning ishlirigha arilashqanliqini‚ bes-beste tenqid qilghan we shinjangning hazirqi weziyitining tarixta körülüp baqmighan derijide yaxshiliqi, xelqning bext tuyghusining yüksek pellige chiqqanliqi, rayondiki her millet xelqining hazirqi künlirining‛heseldinmu tatliq‚ ikenlikini” bildürüshken. 

Chet'ellerdiki musteqil kishilik hoquq organliri pakitlar arqiliq rayonda hazir ikki milyon etrapida Uyghur qatarliq milletlerning yighiwélish lagérlirida zulum körüwatqanliqini, lagér sirtidiki Uyghurlarningmu orwélche saqchi döliti sistémisi astida qamal qiliniwatqanliqi, ularning tili, dini, pen-ma'arip ishlirining éghir buzghunchiliqqa uchrawatqanliqini, xitay hökümitining pilanliq we sistémiliq halda “Medeniyet qirghinchiliqi” yürgüzüwatqanliqini bildürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.