Ma shingruyning yéza-igilikini ching tutush heqqide yolyoruq bérishi alahide diqqet qozghidi

Muxbirimiz eziz
2022-03-23
Share

Uyghur aptonom rayonluq partkomning sékrétari ma shingruy 22-mart küni qeshqer wilayitide tekshürüshte bolghan. Bu jeryanda u qeshqer wilayitining etiyazliq térilghugha teyyarliq qilish xizmitini sürüshte qilghan hemde “Partiye merkiziy komitétining yéngi dewridiki shinjang xizmiti istratégiyesini toluq izchillashturush üchün yéza-igilik ishlepchiqirishini ching tutush” toghrisida muhim yolyoruq bergen. Bu qétimqi tekshürüshke Uyghur aptonom rayonluq hökümet we partkomning muhim kattibashlirining hemmisi hemrah bolghan.

Xitay hökümitining bashqurishidiki “Tengritagh” torining 22-marttiki xewiride éytilishiche, nöwette qeshqer wilayiti yéza-igilik ishlepchiqirishi we baqmichiliq qurulushini zor küch bilen rawajlanduriwatqan bolup, shu qatarda “Milyon tuyaqliq sortluq qoy férmisi” qurulushi jiddiy dawam qilmaqta iken. Ma shingruy qeshqer shehiri we bashqa nahiyelerni közdin kechürüsh jeryanida etiyazliq térilghuning waqtini qoldin bérip qoymasliq, yéza xizmitini toluq izchillashturup yéza-igilik ishlepchiqirishining muqim éshishigha kapaletlik qilishni alahide jékiligen.

Xitay hökümitining yéqinqi xewerliri ularning Uyghur diyarini eng chong ashliq we baqmichiliq bazisigha aylandurush hemde shu arqiliq xitayning bu jehettiki éhtiyajlirini qamdashni közlewatqanliqidin melumat bergen idi. Shu qatarda Uyghur diyarining xitaydiki eng chong choshqa baqmichiliq bazisi bolush aldida turiwatqanliqi her sahening zor diqqitini qozghighan idi.

Melum bolushiche, xitay dunyadiki eng chong ashliq import qilghuchi döletlerning biri bolup, ötken yillardiki tajisiman wirusi, dunyaning xitay bilen bolghan munasiwitide körülüwatqan yiriklishish hemde xitay hökümitige qaritilghan türlük iqtisadiy jaza tedbirliri xitayda yéqin kelgüside ashliq qehetchilikini keltürüp chiqirishi mümkin, dep qaralmaqta iken. Emdilikte ma shingruyning yéza-igilikini ching tutushni bir türlük zor siyasiy wezipe qatarida tekitlishi, bu jehettiki bezi ichkiy ehwallardin bisharet, dep qariliwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet