Xitay da'iriliri Uyghur diyarida yene 200 ming a'ilini yurt-makanliridin köchürüshni pilanlimaqtiken

Muxbirimiz irade
2019-05-16
Élxet
Pikir
Share
Print

"Shinjang géziti" ning xewirige qarighanda, xitay da'iriliri bu yil Uyghur élidiki yézilarda "Emin öy qurulushi" pilani boyiche yene 200 ming a'ilini köchürüshni pilanlimaqtiken.

Xewerde bayan qilinishiche, xitay merkizi hökümitining maliye yardimi bilen élip bériliwatqan bu qurulushta Uyghur diyaridiki yéza ahalisini yüz kölimi 40-60 kwadrat métirdin ashmaydighan kichik öylerge köchürüp, "Omumyüzlük qaplash, azraqmu boshluq qoymasliq" ishqa ashurulidiken. 

Xitay da'iriliri "Emin öy qurulushi" ni "Namratlarni köchürüsh arqiliq yölesh" qurulushi dep teshwiq qilip kelgen idi. Biraq chet'ellerdiki Uyghur közetküchiler buni Uyghurlarni yer-zéminliridin ayrishni meqset qilghan qurulush, dep qarimaqta. 

Ular xitay hökümitining ilgirimu "Yer tewreshke chidamliq öy qurulushi" arqiliq Uyghurlarni ewladmu-ewlad yashap kelgen öy-jay we zéminliridin ayriwetkenlikini bildürdi.

Derweqe, radiyomiz ilgiri igiligen uchurlarda qumulning menzirilik taghliq rayonliridiki yéza ahalisining yuqiriqi siyasetlerge asasen bir tutash halda sheher etrapidiki hökümet salghan tar-tapchuq, töwen ijarilik turalghulargha köchürülgenliki, yéridin ayrilghan bu kishilerning namratliqtin qutulush emes, eksiche téximu namratliship, hökümet bergen qutquzush puligha qarap qalghanliqi melum bolghan. 

Közetküchilerning körsitishiche, xitayning bu "Emin öy qurulushi" lagér sirtidiki Uyghur yéza ahalilirini bir yerge yighip, ularnimu oxshashla kontrol astigha élishni meqset qilidiken.

Toluq bet