Xitay da'iriliri Uyghur rayonida yerlik xelqni keng kölemlik "Zongza bayrimi" ni tebrikleshke teshkilligen

Muxbirimiz erkin
2019-06-10
Élxet
Pikir
Share
Print

Xitay hökümiti Uyghur rayonida yerlik milletlerni xitay xelqining milliy bayramlirini tebrikleshke teshkillep, Uyghur medeniyitining ornigha "Jungxu'a medeniyiti" ni omumlashturush herikitini izchil dawamlashturmaqta. Xitay taratqulirining ashkarilishiche, da'iriler ötken heptining axiri Uyghur aptonom rayoni miqyasida her xil pa'aliyetlerni uyushturup, yerlik xelqlerni xitaylar bilen birge "Zongza bayrimi" ni tebrikleshke teshkilligen. Da'iriler aqsuning onsu nahiyisidiki oqtérek kentidek bezi yéza-kentlerde "Milletler ittipaqliqini kücheytip, jungxu'a medeniyitini ewj aldurayli" dégen témida "Qoshmaqlashqan tughqanlarning zongza bayrimini tebriklesh, zongza medeniyitini teshwiq qilish, zongza tügüsh we yéyish qatarliq en'eniwi ta'amlar musabiqisi" ötküzgen. Bu heqtiki xewerlerde, "Musabiqige tallan'ghan zongza tügüsh we tamaq pishurush mahirlirining qatniship, Uyghurlargha "Zongza medeniyitining ehmiyiti hés qildurulghanliqi", musabiqide tallan'ghan mahirlarning mukapatlan'ghanliqi tekitlen'gen.

Zongza bayrimi xitaylarning 4 chong milliy bayrimining biri bolup, u buningdin 2 ming nechche yüz awwal özini minjyang deryasigha tashlap ölüwalghan klassik xitay sha'iri chü yü'enni xatirilesh namida peyda bolghan. Kéyinki esirlerde bu xatirilesh küni bayramgha özgirip, sherqiy asiya medeniyette chembirikidiki xelqlerning ortaq bayrimigha aylan'ghanidi. 

Xitay hökümiti 2017‏-yildin bashlap Uyghurlarni xitayning chaghan, chokantal qatarliq milliy bayramlirini mejburi tebrikleshke uyushturup kelmekte. Uyghur kishilik hoquq teshkilatlirining ilgiri sürüshiche, xitay hökümitining bir tereptin noruz, qurban héyt, roza héyt, doppa bayrimidek diniy we milliy bayramlirini cheklep, yene bir tereptin Uyghurlarni chaghan, chokantal bayrimi, zongza bayrimidek en'eniwi xitay héyt-bayramlirini ötküzüshke mejburlishi, uning Uyghur rayonida omumyüzlük ijra qiliwatqan Uyghur medeniyitini yoqitip, Uyghurlarni omumyüzlük assimilyatsiye qilish siyasitining bir qismi iken".

Toluq bet