Xitay da'iriliri ningshya partkomining da'imiy ezasini Uyghur aptonom rayonigha yötkep kelgen

• Muxbirimiz erkin
  2021-09-03

Xitay da'iriliri ningshya tunggan aptonom rayonluq partkomning da'imiy ezasi, yinchüen shehrining partkom sékritari jang juni yéqinda Uyghur aptonom rayonluq partkomning da'imiy ezasi qilip yötkep kelgen. Lékin xitay taratqulirida uning Uyghur rayonigha yötkep kélinish sewebi we konkért qandaq wezipe eydighanliqi tilgha élinmighan. Buning aldida, yeni bu yil 3-ayda amérika, kanada, en'gilye we yawropa ittipaqi ju xeylün, wang jünjéng, chén minggo, wang mingshen qatarliq Uyghur aptonom rayonining töt neper yoqiri derijilik xitay emeldarigha Uyghurlarni bashturushta oynighan roli seweblik jaza élan qilghan idi.

Ularning ichidiki wang jünjéngmu téxi buningdin ikki yil awwal Uyghur éligha yötkep kélin'gen idi. Xitayning bu qétimliq emeldar yötkishining imbargodin kéyinla élip bérilishi diqqet qozghidi. Xitaydiki “Maliye xewerliri” torining ashkarlishiche, ningshyada tughulghan 53 yashliq jang ju téxi 7 awwal yinchüen shehrining partkom sékritarliqigha östürülgen bolup, u nöwette Uyghur aptonom rayonluq partkomning eng yash da'imiy ezasi iken. Jang ju yéqinqi 3 yil ichide Uyghur aptonom rayonluq partkomning da'imiy ezaliqigha ningshyadin yötkep kélin'gen 2-emeldar iken.

Da'iriler 2018-yili 9-ayda ningshya partkomining da'imiy ezasi ji jéngni Uyghur aptonom rayonliq partkomning da'imiy ezaliqigha yötkep kélip, teshkilat bölümining bashliqliqigha teyinligen. Biraq u kéyinki yili 12-ayda béyjinggha yötkep kétilgen idi. Jang ju xitay hökümiti xelq'ara Uyghurlarda “Irqiy qirghinchiliq” qilish bilen eyiblip, xitayni jawabkarliqqa tartish sadaliri künséri küchiyiwatqan halqiliq bir waqitta Uyghur rayonigha yötkep kélin'gen.