Уйғур елидики җ х органлириға штат сиртидики хизмәтчи хадимларниң көпләп қобул қилиниши диққәт қозғиди

Мухбиримиз ирадә
2019-10-11
Елхәт
Пикир
Share
Принт

Йеқинда уйғур елиниң һәрқайси наһийәлиридики җамаәт хәвпсизлик органлириға штат сиртидики хизмәтчи хадим қобул қилиш һәққидики еланлар көпәймәктә.

8-Өктәбир күни, лопнур наһийәлик җамаәт хәвпсизлик идариси җәмийәттин 70 нәпәр штат сиртидики хизмәтчи хадим қобул қилидиғанлиқи һәққидә уқтуруш чиқарған болуп, қобул қилиш обйектлири толуқ оттура мәктәп вә униңдин юқири мәктәпләрни пүттүргәнләр вә һәрбий сәптин чекингән яшларни асас қилидикән. Уқтурушта намзатларниң террорлуққа қарши туруш, муқимлиқни қоғдаш ипадисиниң гәвдилик болуши, дөләтниң сиясәтлирини чин қәлбидин һимайә қилидиған болуши тәләп қилинған. 

Чақилиқ наһийәсиму 3-өктәбир күни һөкүмәт тор бетидә җамаәт хәвпсизлик идарисигә штат сиртида қобул қилинған 60 әтрапида хизмәтчи хадимниң тизимликини елан қилған. Йеқиндин буян, уйғур елиниң җамаәт хәвпсизлик саһәсигә қобул қилиниватқанларниң асасән штат сиртидики вақитлиқ хадимлар болуши диққәт қозғаватқан амилларниң бири болуп, көзәткүчиләр буниң райондики чекидин ашқан бихәтәрлик тәдбирлири сәвәбидин сақчи вә аманлиқ хадимлириниң зиммисигә чүшкән һәддидин артуқ хизмәт бесимини йәңгиллитишкә мунасивәтлик болуши мумкинликини пәрәз қилишмақта. 

Чүнки хитайдики иҗтимаий тор бәтләрдә вә «зимистан» тори қатарлиқларда асасий қатламда хизмәт қиливатқан хизмәтчиләр болупму сақчи вә ярдәмчи сақчи хадимлириниң уйғур елидә аз дегәндә 3 йилдин бери давам қиливатқан пәвқуладдә түзүм сәвәбидин 48 саәтләп тохтимай ишләватқанлиқи, сақчиларниң чарчап өлүш вә ағрип йетип қелиштәк әһваллар көпләп йүз бәргәнликтин, наразилиқ һәм шундақла хизмәттин бизар болуштәк кәйпиятниң шәкиллиниватқанлиқи ашкариланған иди. 

Дәрвәқә, юқиридики лопнур наһийәлик җамаәт хәвпсизлик идариси бу йил 9-айдиму штат сиртида 70 нәпәр хизмәтчи хадим қобул қилиш уқтуруши чиқарған болуп, бир айдин кейинла йәнә 70 нәпәр адәм қобул қилиш һәққидә уқтуруш чиқириши диққәт қозғайдикән.

Пикирләр (0)
Share
Толуқ бәт