Хитай компартийәси уйғур районидики «рәзил күчләр вә қара гуруһлар» ни тазилашта «техиму үнүмлүк тәдбирләр» ни елишини тәләп қилған

Мухбиримиз әркин
2019-11-04
Елхәт
Пикир
Share
Принт

Хитай даирлири уйғур аптоном районида қанат яйдуруливатқан «рәзил күчләр вә қара гуруһлар» ға қарши туруш һәрикитидә йәрлик даириләрниң «техиму үнүмлүк тәдбирләр» ни елиши вә «техиму биҗанидил» болушини тәләп қилған. Бу тәләп хитай компартийәси мәркизи комитетиниң «рәзил күчләр вә қара гуруһлар» ға қарши 21‏-назарәт гурупписиниң 3‏-ноябир күни үрүмчидә өткүзүлгән хизмәт доклати йиғинида оттуриға қоюлған. Хитайниң «рәзил күчләр вә қара гуруһлар» ға зәрбә бериш намидики һәрикити иҗтимаий қилмишларға қарши мәмликәт характерлик һәрикәт болсиму, лекин уйғур районидики һәрикәттә йәрлик кадирлар, сода вә диний саһәдики сәрхилләр нуқтилиқ зәрбә бериш нишаниға айланғанлиқи илгири сүрүлмәктә. Мәзкур һәрикәт хитайниң йеқинқи 3 йил ичидә уйғур районидики кәң көләмлик тутқун билән бир вақитта елип барған 2‏-қетимлиқ һәрикити һесаблиниду.

Хитай һөкүмити 2017‏-йили башланған тутқун билән бир вақитта «икки йүзлимичиләр» гә зәрбә бериш һәрикити қозғап, нурғун йәрлик кадирлар вә зиялийларни бастурғаниди. Кишилик һоқуқ тәшкилатлириниң илгири сүрүшичә, униң кейинки һәрикити кәң көләмлик тутқанда яки «икки йүзлимичиләр» гә зәрбә бериш һәрикитидә тордин чүшүп қалған кадир, сода-карханичи, йәрлик җамаәт әрбаплириға қаритилғаникән.

«Шинҗаң гезити» ниң хәвәр қилишичә, 3‏-ноябир күни өткүзүлгән йиғинда, мәркәзниң 21‏-назарәт гурупписиниң башлиқи соң дахән сөз қилип, районниң «рәзил күчләр вә қара гуруһлар» ни тазилаш һәрикитидә «негизлик нуқтини гәвдиләндүрүп, бир туташ пиланлаш, мәркәзниң орунлаштурушини қәтий иҗра қилиш» ни тәктилигән. Униң илгир сүришичә, йәрлик даириләр «рәзил күчләр вә қара гуруһлар» ға қарши турушта мәхсус түрләр, нуқтилиқ районлар, нуқтилиқ делолар вә нуқтилиқ мәсилиләрни чөридигән һалда 4 хил вәзипини тәкитләп, буниңға қарита «техиму үнүмлүк тәдбирләрни елиши, техиму биҗанидиллиқ билән һәр хил мәхсус хизмәт түрлирини биҗа кәлтүрүши керәк» икән. Соң дахән бу сөзләрни америка башчилиқидики демократик дөләтләр хитайниң йиғивелиш лагерлирини тақап, лагердики 2 милйондәк тутқунни қоюп беришни қаттиқ тәләп қиливатқан мәзгилдә қилған.

Пикирләр (0)
Share
Толуқ бәт