Xitay kompartiyesi Uyghur rayonidiki “Rezil küchler we qara guruhlar” ni tazilashta “Téximu ünümlük tedbirler” ni élishini telep qilghan

Muxbirimiz erkin
2019.11.04

Xitay da'irliri Uyghur aptonom rayonida qanat yayduruliwatqan “Rezil küchler we qara guruhlar” gha qarshi turush herikitide yerlik da'irilerning “Téximu ünümlük tedbirler” ni élishi we “Téximu bijanidil” bolushini telep qilghan. Bu telep xitay kompartiyesi merkizi komitétining “Rezil küchler we qara guruhlar” gha qarshi 21‏-nazaret guruppisining 3‏-noyabir küni ürümchide ötküzülgen xizmet doklati yighinida otturigha qoyulghan. Xitayning “Rezil küchler we qara guruhlar” gha zerbe bérish namidiki herikiti ijtima'iy qilmishlargha qarshi memliket xaraktérlik heriket bolsimu, lékin Uyghur rayonidiki herikette yerlik kadirlar, soda we diniy sahediki serxiller nuqtiliq zerbe bérish nishanigha aylan'ghanliqi ilgiri sürülmekte. Mezkur heriket xitayning yéqinqi 3 yil ichide Uyghur rayonidiki keng kölemlik tutqun bilen bir waqitta élip barghan 2‏-qétimliq herikiti hésablinidu.

Xitay hökümiti 2017‏-yili bashlan'ghan tutqun bilen bir waqitta “Ikki yüzlimichiler” ge zerbe bérish herikiti qozghap, nurghun yerlik kadirlar we ziyaliylarni basturghanidi. Kishilik hoquq teshkilatlirining ilgiri sürüshiche, uning kéyinki herikiti keng kölemlik tutqanda yaki “Ikki yüzlimichiler” ge zerbe bérish herikitide tordin chüshüp qalghan kadir, soda-karxanichi, yerlik jama'et erbaplirigha qaritilghaniken.

“Shinjang géziti” ning xewer qilishiche, 3‏-noyabir küni ötküzülgen yighinda, merkezning 21‏-nazaret guruppisining bashliqi song daxen söz qilip, rayonning “Rezil küchler we qara guruhlar” ni tazilash herikitide “Négizlik nuqtini gewdilendürüp, bir tutash pilanlash, merkezning orunlashturushini qet'iy ijra qilish” ni tektiligen. Uning ilgir sürishiche, yerlik da'iriler “Rezil küchler we qara guruhlar” gha qarshi turushta mexsus türler, nuqtiliq rayonlar, nuqtiliq délolar we nuqtiliq mesililerni chöridigen halda 4 xil wezipini tekitlep, buninggha qarita “Téximu ünümlük tedbirlerni élishi, téximu bijanidilliq bilen her xil mexsus xizmet türlirini bija keltürüshi kérek” iken. Song daxen bu sözlerni amérika bashchiliqidiki démokratik döletler xitayning yighiwélish lagérlirini taqap, lagérdiki 2 milyondek tutqunni qoyup bérishni qattiq telep qiliwatqan mezgilde qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.