Уйғур аптоном райони кәспий органларниң хизмәтчи елиш һоқуқини қоюп бәргән

Мухбиримиз әркин
2019-11-08
Елхәт
Пикир
Share
Принт

Уйғур аптоном районлуқ кадирлар назарити йеқинда һөҗҗәт чүшүрүп, райондики шәһәр, вилайәт, област вә аптоном район дәриҗилик кәспий органларниң хизмәтчи елиш һоқуқини қоюп бәргән.

Йеңи бәлгилимидә бу органларниң қанчилик хизмәтчи қобул қилишни еһтияҗиға қарап, уларниң өзи қарар қилидиғанлиқи, кадирлар назаритиниң тәстиқини елишқа һечқандақ һаҗәт йоқлуқи илгири сүрүлгән. 

Көзәткүчиләрниң илгири сүрүшичә, уйғур аптоном районлуқ кадирлар назаритиниң юқириқи һөҗҗити униң мәзкур районға техиму көп көчмән йөткишигә кашила болуватқан қаидә-түзүмләрни бикар қилишни мәқсәт қилидикән. Хитай һөкүмити 2017‏-йили 3‏-айдин башлап уйғур, қазақ вә райондики башқа мусулманларни кәң көләмдә тутқун қилип, лагерларға қамаш бир бир вақитта ичкири өлкиләрдин райондики кархана вә кәспи органларға кәң көләмлик хизмәтчи қобул қилишқа башлиған. Бу йилниң кейинки йериминиң өзидила үрүмчи шәһириниң маарип саһәсигә 1500 дәк оқутқучи қобул қилинған иди. 

«Тәңритағ» ториниң 8‏-ноябирдики хәвиридә қәйт қилинишичә, аптоном районлуқ кадирлар назаритиниң «ихтисас игилириниң бималал тәртиплик йөткилишидә базарниң ролини толуқ җари қилдуруш тоғрисидики пикир» намлиқ һөҗҗитидә униң «аптоном район, шәһәр, вилайәт, област дәриҗилик кәспий органларниң хизмәтчи қобул қилиштики ғоҗидарлиқ һоқуқини кеңәйтип, ихтисас игилириниң йөткилишигә кашила болуватқан бекинмичилик һалитини бузуш ташлаш. . . Кәспий орунларниң еһтияҗлиқ ихтисас игилирини дәрһал толуқлишиға түрткә болуш» мәқситидә чүшүрүлгәнлики тәкитләнгән. 

Лекин чәтәлдики уйғур кишилик һоқуқ тәшкилатлириниң илгири сүрүшичә, хитай һөкүмити 3 милйондәк уйғурни йиғивелиш лагерлириға қамап, кәспий органлардики улардин бош қалған хизмәт орунлирини хитайлар билән толдурмақта икән. Лекин хитай һөкүмити районда йиғивелиш лагерлириниң мәвҗутлуқини изчил рәт қилип кәлмәктә. Уларниң илгири сүрүшичә, бу лагерлар радикаллиққа қарши «кәспий тәрбийәләш мәркәзлири» икән.

Пикирләр (0)
Share
Толуқ бәт