Хитай һөкүмити уйғур районида “террорлуқни түп йилтизидин қурутуш” үчүн уйғурларни бастуруш сияситини һәргиз бошаштурмайдикән

Хитайниң уйғур районида йүргүзүватқан вә тәдриҗий һалда ирқий қирғинчилиқ җинайитигә айланған қәбиһ сиясити изчил давамлашмақта. Гәрчә хитай йеқиндин бери уйғур районидики хәлқниң намратлиқтин қутулуп бәхтлик яшаватқанлиқиға даир көплигән тәшвиқатларни елип берип, бәзи кишиләрниң еңида хата туйғу бериватқан болсиму, әмәлийәттә хитайниң йеңи усуллар билән хәлқни бастуруватқанлиқи, мәсилән, уларни завутларда вә пахта етизлирида қул орнида ишләшкә мәҗбурлаватқанлиқи мәлум.

Америка “бломберг хәвәрлири” таратқусиниң 21-декабирдики бир хәвиридә ашкарилишичә, уйғур аптоном районлуқ партком тәшвиқат бөлүминиң муавин башлиқи шүй гуйшяң бейҗиңда америка мухбирлириниң зияритини қобул қилғанда уйғур районидики зәрбә бериш һәрикитиниң қилчә бошаштурулмайдиғанлиқи, һөкүмәтниң йәнила “әсәбийликни түп йилтизидин қурутуш” ни муһим орунға қойидиғанлиқи һәққидә учур бәргән. У мундақ дегән: “биз һазир өзимиздин қанаәтлинип қалсақ болмайду, чүнки бу райондики тәһдит йәнила мәвҗут”.

Бу хитай әмәлдариниң билдүрүшичә, хитай компартийәси уйғур районида қолланған тәдбирини техиму мустәһкәмләватқан болуп, муқимлиқи сақлаш үчүн йәнә йеңи чариләрни издәветипту. У йәнә америкиниң “шәрқий түркистан ислам һәрикити тәшкилати” ни террорлуқ тизимликидин чиқиривәткәнликини уларниң террорлуқ қилишиға илһам бәргәнлик дәп қарап мундақ дегән: “4 йилдин бери уйғур районида террорлуқниң йүз бәрмигәнлики бу тәһдит вә хәтәрниң пүтүнләй түгигәнликидин дерәк бәрмәйду”.

Анализчиларниң қаришичә, хитайниң уйғур районида муқимлиқни сақлаш үчүн йеңи чариләрни издиши уларниң йеңи шумлуқларни пиланлаватқанлиқидин дерәк беридикән. Хитайниң “бу районда йәнила террорлуқ тәһдити бар” дәп турувелиши әмәлийәттә хитайниң буниңдин башқа баһаниси йоқлуқи вә буниңдин пайдилинип уйғурларни давамлиқ бастуридиғанлиқини чүшәндүридикән.