Xitay hökümiti Uyghur rayonida "Térrorluqni tüp yiltizidin qurutush" üchün Uyghurlarni basturush siyasitini hergiz boshashturmaydiken

Muxbirimiz jewlan
2020-12-21
Share

Xitayning Uyghur rayonida yürgüzüwatqan we tedrijiy halda irqiy qirghinchiliq jinayitige aylan'ghan qebih siyasiti izchil dawamlashmaqta. Gerche xitay yéqindin béri Uyghur rayonidiki xelqning namratliqtin qutulup bextlik yashawatqanliqigha da'ir köpligen teshwiqatlarni élip bérip, bezi kishilerning éngida xata tuyghu bériwatqan bolsimu, emeliyette xitayning yéngi usullar bilen xelqni basturuwatqanliqi, mesilen, ularni zawutlarda we paxta étizlirida qul ornida ishleshke mejburlawatqanliqi melum.

Amérika "Blombérg xewerliri" taratqusining 21-dékabirdiki bir xewiride ashkarilishiche, Uyghur aptonom rayonluq partkom teshwiqat bölümining mu'awin bashliqi shüy guyshyang béyjingda amérika muxbirlirining ziyaritini qobul qilghanda Uyghur rayonidiki zerbe bérish herikitining qilche boshashturulmaydighanliqi, hökümetning yenila "Esebiylikni tüp yiltizidin qurutush" ni muhim orun'gha qoyidighanliqi heqqide uchur bergen. U mundaq dégen: "Biz hazir özimizdin qana'etlinip qalsaq bolmaydu, chünki bu rayondiki tehdit yenila mewjut".

Bu xitay emeldarining bildürüshiche, xitay kompartiyesi Uyghur rayonida qollan'ghan tedbirini téximu mustehkemlewatqan bolup, muqimliqi saqlash üchün yene yéngi charilerni izdewétiptu. U yene amérikining "Sherqiy türkistan islam herikiti teshkilati" ni térrorluq tizimlikidin chiqiriwetkenlikini ularning térrorluq qilishigha ilham bergenlik dep qarap mundaq dégen: "4 Yildin béri Uyghur rayonida térrorluqning yüz bermigenliki bu tehdit we xeterning pütünley tügigenlikidin dérek bermeydu".

Analizchilarning qarishiche, xitayning Uyghur rayonida muqimliqni saqlash üchün yéngi charilerni izdishi ularning yéngi shumluqlarni pilanlawatqanliqidin dérek béridiken. Xitayning "Bu rayonda yenila térrorluq tehditi bar" dep turuwélishi emeliyette xitayning buningdin bashqa bahanisi yoqluqi we buningdin paydilinip Uyghurlarni dawamliq basturidighanliqini chüshendüridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet