Aqsuda ikki kishi "Ashqunluq" we "Milliy öchmenlikke qutratquluq qilish" bilen eyiblinip tutqun qilin'ghan

Muxbirimiz erkin
2021-03-23
Share

Aqsuda ikki kishi ijtima'iy taratqularda "Ashqunluq" qa a'it yazma we resimlerni tarqitish, "Milliy öchmenlikke qutratquluq qilish" bilen eyiblinip tutqun qilin'ghan. Shuningdek yene 43 undidar topi "Namuwapiq uchurlar" ni tarqatqanliqi üchün taqiwétilgen.

"Tengritagh tori" ning xewer qilishiche, tutqunlarning biri ötken yili 18-noyabirda, yene biri bu yil 31-yanwarda tutqun qilin'ghan iken. Bu tutqunlar Uyghur aptonom rayonluq tor-uchur bashqurush ishxanisi qatarliq orunlar 23-mart élan qilghan "Qanun-tüzümge xilap tipik 12 délo" heqqidiki uqturushida tilgha élin'ghan.

Uningda tutqunlarning toluq ismi, milliti, konkirét ehwali tilgha élinmighan bolsimu, biraq xewerdin bu ikkeylenning Uyghur ikenlikini qiyas qilish mumkin. Xewerde éytilishiche, aqsuluq tutqunlardin biri ijdima'iy taratqularda "Diniy ashqunluq idiyesi" terghip qilin'ghan yazma we resimlerni tarqatqanliqi, yene biri "Milliy öchmenlikke qutratquluq qilidighan", "Milletler ittipaqliqi" gha buzghunchiliq qilidighan awazliq uchurlarni tarqatqanliqi üchün tutqun qilin'ghan.

Xewerde tutqunlardin "Ashqunluq" qa a'it uchur tarqatqan shexsning "Jinayi ishlar boyiche" qolgha élin'ghanliqi, "Milliy öchmenlikke qurtarquluq qilghan" bireylenning "Memuriy jehettin tutup turulghanliqi" tekitlen'gen. Xewerde éytilishiche, taqiwétilgen 43 ündidar topi türlük yazma, resim we sin körünüshliri arqiliq köp qétim "Namuwapiq uchurlar" ni tarqitip, "Yaman tesir" peyda qilghanliqi üchün taqiwétilgen iken. Xewerde bu 43 ündidar topining "Ru'ay salun", "Külqiz338", "Yumurchi0908" qatarliq toplarni öz ichige alidighanliqi tekitlen'gen. Emma xewerde bu toplarni qurghuchilarning teqdirining qandaq bolghanliqi tilgha élinmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet