Uyghur rayonida bu yilning deslepki 8 éyida "Merkezning 8 xil belgilimisi" ge xilapliq qilghan 839 kadir bir terep qilin'ghan

Muxbirimiz erkin
2019-09-13
Share

Uyghur aptonom rayonida bu yilning deslepki 8 éyida "Merkezning 8 xil belgilimisi" ge xilapliq qilghan, dégen seweb bilen 839 neper kadir bir terep qilinip, 661 kadirgha intizam we memuriy jaza bérilgen. "Shinjang géziti" ning 13‏-séntebir xewer qilishiche, Uyghur aptonom rayonidiki intizam tekshürüsh we réwiziye tarmaqliri bu mezgil ichide "Merkezning 8 xil belgilimisi" ge xilap 774 déloni éniqlap chiqqan. Yuqiriqi kishiler bu 774 délogha chétishliq iken. Xitay re'isi shi jinping hakimiyet béshigha chiqqandin kéyin chériklikke qarshi turush herikiti qozghap, tüzümge xilap yep-ichish, tüzümge xilap sogha-salam élish, hökümet eshyalirini tüzümige xilap ishlitishni öz ichige alghan 8 xil belgilime chiqarghan. Bu heriket Uyghur rayonida yéqinqi ikki yil ichide nurghun yerlik kadirlarning jazalinishigha seweb bolghan.

Chet'eldiki Uyghur pa'aliyetchiler yuqiriqi 8 xil belgilime xitayning Uyghur rayonidiki siyasitige yoshurun qarshi turghan yaki uni aktip qollimighan Uyghur kadirlirini jazalashning bahanisige aylinip qalghanliqini ilgiri sürüp kelgenidi. Mezkur rayonda yéqinqi ikki yil ichide 8 xil belgilimige xilapliq qilish bilen eyiblinip jazalan'ghanlar awat nahiyilik 1‏-ottura mektepning mudiri hörigül dawut, xoten shehiri narbagh ijtima'iy rayonining bashliqi rozinisa hoshur, guman nahiyisi pishna yéziliq sehiye ornining bashliqi memtimin exmet, qarimay sheherlik milliy-diniy ishlar komitétining xadimi lutpulla haji qatarliq nurghun yerlik kadirlarni öz ichige alghanidi. 

"Shinjang géziti" ning ashkarilishiche, Uyghur aptonom rayonluq intizam tekshürüsh we réwiziye komitéti 9‏-séntebir küni mezkur belgilimige xilapliq qilghan yene 8 tipik déloni élan qilghan. Bu 8 tipik déloda awat nahiyilik 1‏-ottura mektepning mudiri hörigül dawut, xoten shehiri narbagh ijtima'iy rayonining bashliqi rozinisa hoshurning ismi tilgha élin'ghan. Hörigül dawut qurban héytliq sogha qobul qilish, rozinisa hoshur qurban bashqilarning bergen bézek buyumi, qol sa'iti qatarliq sowghilirini élish bilen eyiblen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet